320. In Inventione s. Vincentii.

1 a. Omnis homo gaudeat,
Pacem mundus habeat,
Iubilet ecclesia.

1b. Festiva Vincentii,
Martyris egregii,
Fulgent natalitia.

2 a. Qui mundus a vitiis
Literarum studiis
Datur ab infantia.

2 b. Vinctis ferro manibus
Et compede pedibus
Sudat sub custodia.

3 a. Verum Deum praedicat,
Falsos deos abdicat
Miranda constantia.

3 b. Dacianus igitur

Furit, dum confunditur
Levitae facundia.

4 a. Eculeo ponitur,

Membratim extenditur,
Rumpuntur vitalia.

4 b. Ignem cratis superat
Igne, quo repleverat
Eum Dei gratia.

5 a. Multa mortis genera
Caro suffert tenera
Forti patientia.

5 b. Sanctum sanctus spiritus
Consolatur caelitus,
Dolor fit remedia.

6 a. Retruso ergastulo
Stupendo miraculo
Astat caeli curia.

6 b. Testarum duritia

Florum fit fragrantia,
Lumen replet atria.

7 a. Dum Deus de praemio,
Praeses de supplicio
Vice tractant varia,

7 b. In lecti mollitie

Mutat poenas gloriae,
Terrenis caelestia.

8 a. Proiecto a facie

Hominum et bestiae
Serviunt et maria:

8 b. Avis servat mortuum,
Mare fert innocuum
Ad terrarum spatia.

9 a. Tuis, martyr, precibus
Salva nos ab hostibus,
Dele nostra vitia.

9 b. Duc nos ad palatia,
Ubi cum laetitia
Cantemus Alleluia.