326. De sancto Viviano.

1 a. In honore Viviani

Sollemnizent christiani
Grata dantes gaudia ;

1 b. Tenerentur et collaudent
Confessorem, in quo gaudent
Fidei concordia.

2 a. Sicut spina profert rosam
Sine spinis speciosam,
Gens pagana protulit ;

2 b. Hunc regalis stirps produxit,
Et de nocte lux illuxit
Obscuraque reppullit.

3 a. Postquam filius nequivit
Dici, ius hunc stabilivit
Xanctoniae comitem.

3 b. Sed contemnens comitatum
Totum figit anhelatum
Ad polorum limitem.

4 a. Pompam spernens saecularem
Togam vestit regularem
Tonso crine capitis.

4 b. Lege Dei meditatur,
Beatus vir vocitatur
Pro fidei meritis.

5 a. Legit, studet in divinis,
Vacat missis matutinis,
Egenis compatitur.

5 b. Tantae fulgens sanctitatis
Xanctonensis civitatis
Pontifex assumitur.

6 a. Bonus, pius, mansuetus,
Indiscretis vir discretus
Refulget virtutibus.

6 b. Nam puerum exspiratum,
A vipera sauciatum
Tollit mortis morsibus.

7 a. Ad hunc veniens leprosus.
Ore, corde lacrimosus,
Voti compos exstitit.

7 b. Aridas habentem manus
Signo crucis Vivianus
Sospitati praestitit.

8 a. Orat praesul, exauditur,
Ab angelis urbs munitur
Armatorum specie ;

8 b. Visis Gothi revertuntur,
Quidam unda submerguntur
Timoris pernicie.

9 a. Boves clepit fur vesanus,
Insensatus et profanus,
Super quibus Vivianus
Tolosam pervenerat;

9 b. Reum furti se fatetur
Et fateri non veretur,
Dum in loco detinetur,
Quo furtum commiserat.

10 a. Applicante mercatore
Pretioso cum cruore
Vivianum cum tremore
Daemones vociferaut,

10 b. Per ordinem rem scientes
Civitatis sapientes
Reliquias reponentes
Diem festum iterant.

11a. Post haec migrans ex hac vita
Fidelis Israelita
Intravit ad nuptias.

11 b. Ad quas, pie, nos, confessor,
Stans pro nobis intercessor,
Pervenire facias.