329. De sancto Wiberto.

1 a. Laetetur ecclesia
Sollemni melodia
Recolens magnalia
Redemptoris.

1 b. Monachorum agmina
Voce promant inclita
Guiberti praeconia
Confessoris.

2 a. Hic abundans praediis

Et vita laudabilis

Effulsit et nobilis

Stirpe clara.

2 b. Ut Deo serviturum
Acquireret populum,
Fundavit coenobium
Dote cara.

3 a. Hic tendens ad supera,
Parvipendens terrea
Se reliquit et sua
Mente pura.

3 b. Hic a cultu daemonum
Errores Hungarorum
Convertit ad Dominum
Voce vera.

4 a. Regulam, quam devovit,
Fideliter tenuit,
Vitam quoque finiit
In Gorzia.

4 b. Sed beatum patronum
Nos semper profecturum
Huc misit tumulandum
Virtus alma.

5 a. Guiberte, nos emenda
Et Deo nos commenda,
Ut sibi sine menda
Serviamus.

5 b. Ut sanctorum praemia
Per tua suffragia
Cum Christo in gloria
Capiamus.