351. De sancto Victore.

1 a. Admiretur Massilica
Plebs, fidelis, catholica,
Nova depromens cantica
In Victoris praeconium.

1b. Gaude, domus Victorina,
Tua refulget doctrina,
Quod miratur Parisina,
Quae estprima urbs urbium.

2 a. Res est nobis mirabilis,
Is, qui quondam spectabilis,
Factus est despicabilis ;
Factum est exsecrabile.

2 b. Huius tanta nobilitas
Ac tanti viri probitas
Et in gestis sagacitas
Tulit factum mirabile.

3 a. O infelix Massilia,
Tu infausta es patria,
In te facta crudelia ;
Patrem tuum occidisti.

3 b. Non vereris protectorem
Accusare sanctiorem,
Hunc custodem et tutorem
Dignum morte iudicasti.

4 a. Scelus istud est horrendum,
Scelus, inquam, non dicendum
Nec populis enarrandum,
Quod patravit Massilia.

4 b. Patrem suum condemnavit
Et patronum iudicavit
Quique urbem expurgavit
Ab omni spurcitia.

5 a. Vir insignis et illustris,
Potens mundo, percelebris,
Qui pugnavit tantis lustris,
Iam securus de praemio ;

5 b. Pugnat pugnam ut expertus,
Certat certum non incertus
Et, qui Christum est secutus,
Palmam defert de bravio.

6 a. Agonista nulli cedens,
In proelio gentes domans
Et fortiter dextra pugnans
Neque cedit in sinistra.

6 b. Ille Christum profitetur,
Ipse palmam promeretur
Nec tyrannum reveretur,
Dum decertat in palaestra.

7 a. Sanctus Victor est invictus,
Qui poenarum tulit ictus,
Inter mundi tot conflictus
Admirante Massilia.

7 b. Post tot plagas, post tot ictus
Semivivus est relictus,
Iam morti victor addictus
Suspirat ad praemia.

8 a. Terroribus nec tormentis
Conturbatur status mentis,
Nec movetur blandimentis,
Perstat in constantia.

8 b. Praeses furit in Victorem,
Christus sancto dat vigorem ;
In hunc exercet furorem
Cum magna infamia.

9 a. Pede prosternit statuam
Nec adoravit luteam,
Fugat idololatriam
Cum stabili fiducia.

9 b. Hic in pede detruncatus
Dum in terra propulsatur,
Statim praeses admiratur
Nec se capit prae furia.

10 a. Solo stratus, equis tractus,
In stipite colligatus,
Duris loris coartatus
Suspirat ad praemium.

10 b. Audit Christum consolantem,
Iniurias patientem
Et tormenta sufferentem,
Statim dicens: Ecce, assum.

11a. Hic raptus a patibulo
Recluditur ergastulo,
Retruditur diluculo
Iam in arta custodia.

11b. Prelo pressus a molari
Iubet caput amputari
Et cum laude singulari
Caeli conscendit atria.

12 a. Moriendo mortem vicit,
Ubi vitam acquisivit
Et cum Christo semper vivit,
Cum beatis in gloria.

12b. Perdit victum temporalem
Habiturus aeternalem,
Flammam fugit infernalem,
Ubi gravis miseria.

13 a. Qui pro Christo moriturus
In aeternum est victurus,
Et cum Christo regnaturus
Cum perenni laetitia.

13 b. Qui pro mundo moriturus
Est cum mundo periturus,
Talem finem habiturus
Moritur in tristitia.

14 a. Qui pro Christo est occisus,
Ille mori mundo visus,
Sed cum Christo est confisus,
Iam percipit caelestia.

14 b. Qui pro mundo est occisus,
Victus remanet confusus
Et a mundo est illusus,
Statim perit cum gloria.

15 a. Is apparet mundo victus,
Qui pro Christo est convictus,
Immo remanet invictus,
Iam vivit nec emoritur.

15 b. Veneretur hic patronus,

Quem caelestis habet thronus,

Ad orandum assit pronus,

Promptus in auxilio.

l6a. Huius vitae post certamen
Largiatur adiuvamen,
Sit afflictis consolamen,
Maestis consolatio.

16 b. Claudis gressus revertitur,
Lux caecis restituitur,
Aegris salus effunditur,
Effugantur daemonia.

17 a. Mortuis vita redditur,
Mutis lingua resolvitur,
Hydropisis consumitur,
Restaurantur per omnia.

17 b. Omnis utriusque sexus,

Quem constringit culpae

nexus,
Qui languore est complexus,
Tua cupit vestigia.

18 a. Victor, modo sublimaris
Et cum Christo gloriaris,
Super omnes nunc laudaris
In caelesti curia.

18b. Tu insignis, Victor, miles,
Pertulisti poenas viles,
Respice nos imbecilles
In hac mundi miseria.

19 a. Verus miles eras, Victor,
Verus fidei professor,
Trinitatis verus cultor,
Veritatis mens conscia.

19 b. Bene, Victor, tu certasti
Et agonem consummasti
Neque fidem denegasti
In tam gravi certamine.

20 a. Palma tibi datur laeta,
Cui tot mala insueta,
Tu, qui fortis es athleta,
In Christi gaudes lumine.

20 b. Sic ubique victor es,
Caelo, terra potens es,
Tibi iure nomen est
Victor a victoria.

21 a. Super celsa ductus, Victor,
Qui in bello factus victor,
Modo noster sis conductor,
Ductor ad caelestia.

21 b. Victorinos nos perducas,
Et ad regnum nos conducas,
Post hanc vitam nos deducas,
Ubi tribunal gloriae.

22 a. O quam felix dies ista,
Qua triumphat agonista,
O quam vera, quam sollennis,
In qua Victor ad perennis
Aulae conscendit atria ;

22 b. Ubi nec cras nec hesternum,
Sed est idem hodiernum,
Ubi salus, ubi vita,
Ubi pax est infinita,
Ubi Deus est omnia.

II. Specimina quaedam SeqLueutiarum Anonymi

Ravennatensis.