359. De sancta Lucia.

1 a. Pange praeconia
Beatae Luciae,
Assunt sollemnia
Summae laetitiae,
Plebs tota laetetur.

1 b. Urbs Syracusana,
Nobilis civitas,
Quam vexat vesana
Morbi infirmitas,
Per te sublevetur.

2 a. Ad bustum sanatur
Sanguinis fluvio,
Sanitas donatur
A Dei filio,

Quaternis vexata.

2 b. Si tu credideris

Fudisse cruorem,
Mater, sanaberis
Per meam sororem
A morbo levata.

3 a. Verbis seductricis
Iuvenis movetur,
Suasu nutricis,

Ut bonum speretur,
Docet commercium.

3 b. Facile seductus

Ad bonum ducitur,
Sperat esse fructus,
Ibi decipitur

Auctor vendentium.

4 a. Novit fallaciam,

Vocavit insanam,
Dicit stultitiam
Spernere humanam
Mundi voluptatem.

4 b. Legem Augustauam
Virgo contempserat
Et se christianam
Esse clamaverat
Servans castitatem.

5 a. Illaesa castitas

Manet in virgine,
Probata puritas
In hoc certamine
A Deo servatur.

5 b. Columna firmata,

Velut mons stabilis,
Non est commutata,
Sed immutabilis,
Ne virgo trahatur.

6 a. Vires iumentorum
Nec maleficia
Paria brutorum
Et veneficia

Unquam nocuerunt.

6 b. Oleum funditur

Nec adurit ignis,
Resina ponitur,
Res facta insignis,
Picem addiderunt.

7 a. Largitur egenis,

Quas habebat, opes,
Donans alienis
Fovebat inopes
Sua substantia.

7 b. Mundi blandimenta,
Terrena munera
Tamquam purgamenta
Argenti pondera
Spernit praesentia.

8 a. Percussa gladio

Mansit semiviva,
Exsultat gaudio
Futura conviva
Aeternae gloriae.

8 b. Clerus accersitus

Affert sacramenta,
Ascendit caelitus
Post tot detrimenta
Regnum laetitiae.

9 a. Lucia lucida,

Omnibus relucens,
Tamquam lux fulgida
Nos ad lucem ducens,
Ubi lux aeterna.

9 b. Lumen in lumine
Videns in gloria,
In caeli culmine,
Ubi laetitia

Et pax sempiterna.