Paenitentiaria Apostolica 201

ACTA TRIBUNALIUM

PAENITENTIARIA APOSTOLICA

DECRETUM

Speciales conceduntur Indulgentiae christifidelibus

occasione «XV Mundialis Infirmorum Diei »

Cum in originale peccatum incidisset homo, et ob hanc ipsam causam

donis se expoliasset sive supernaturalibus sive praeternaturalibus, infinita

sua misericordia, Deus Creator et Redemptor ita ea quae iustitia postulat

et ea quae veniam conciliant, mysterioso coniunxit nexu, ut mala, quae

rationem habent poenae, bona fierent occasio ad offerendam peccatorum

expiationem, ad augendas virtutes, ad aeternam comparandam salutem;

quae Divinae Providentiae dispositio reapse fidelibus applicatur virtute

mysterii Paschalis Christi, qui moriens factus est largitor vitae et resurgens

certissimam spem affert nostrae futurae Resurrectionis.

Age vero, condicio illa qua homo morbis est subiectus, et doloribus

inde manantibus, si quidem Fide, Spe et Caritate operantibus, prout in

divina sanctissima voluntate continetur, accipitur, causa fit maioris sanc-

titatis.

Illud vero peculiarissima ratione meditandum est, humana remedia

limitibus esse signata, et exinde tempus necessario advenire in quo terres-

tris itineris humanae vitae finis urget: huiusmodi aegrotis maximae sunt

impendendae curae, summa est exhibenda caritas, unde transitus ex hoc

mundo ad Patrem divinis solaciis iuvetur, et ita revera - prout Ecclesiae

oratio pro morientibus fert - mitis Iesu Christi vultus appareat infirmis et

vox Eius, ad gloriam et laetitiam aeternam vocantis, clarissime resonet.