6. (3. ) Ad Horam Tertiam.

1. Iam surgit hora tertia,

Qua Christus ascendit crucem, Nil insolens mens cogitet, Intendat affectum precis.

2. Qui corde Christum suscipit, Innoxium sensum gerit Votisque perstat sedulis Sanctum mereri spiritum.

3. Haec hora, quae finem dedit Diri veterno criminis Mortisque regnum diruit Culpamque ab aevo sustulit.

4. Hinc iam beata tempora Coepere Christi gratia, Fidei replevit veritas Totum per orbem ecclesias.

5. Celso triumphi vertice Matri loquebatur suae: En, filius, mater, tuus; Apostole, en, mater tua.

6. Praetenta nuptae foedera Alto docens mysterio, Ne virginis partus sacer Matris pudorem laederet.

7. Cui fidem caelestibus Iesus dedit miraculis, Nec credidit plebs impia; Qui credidit, salvus erit.

8. Nos credimus natum Deum Partumque virginis sacrae, Peccata qui mundi tulit Ad dexteram sedens patris.