10. (7. ) In Epiphaniis Domini.

1. Illuminans altissimus

Micantium astrorum globos, Pax, vita, lumen, veritas, Iesu, fave precantibus.

2. Seu mystico baptismate Fluenta Iordanis, retro Conversa quondam tertio, Praesente sacraris die;

3. Seu stella partum virginis Caelo micans signaverit, Et hoc adoratum die Praesepe magos duxeris;

4. Vel hydriis plenis aquae Vini saporem infuderis, Hausit minister conscius, Quod ipse non impleverat;

5. Aquas colorari videns Inebriare flumina, Elementa mutata stupet Transire in usus alteros.

6. Sic quinque milibus virum Dum quinque panes dividis, Edentium sub dentibus In ore crescebat cibus,

7. Multiplicabatur magis Dispendio cibus suo; Quis haec videns mirabitur luges meatus fontium ?

8. Inter manus frangentium Panis rigatur profluus, Intacta, quae non fregerant, Fragmenta subrepunt viris.