16. (13. ) In Sancti Laurentii Martyris.

1. Apostolorum supparem, Laurentium archidiaconum Pari corona martyrum Romana sacravit fides.

2. Xystum sequens hic martyrem Responsa vatis retulit: Maerere, fili, desine, Sequere me post triduum.

3. Nec territus poenae metu Heres futurus sanguinis Spectavit obtutu pio, Quod ipse mox persolveret.

4. Iam tunc in illo martyre Egit triumphum martyris Successor aequus, syngraphum Vocis tenens et sanguinis.

5. Post triduum iussus tamen Census sacratos prodere, Spondet pie nec abnuit, Addens dolum victoriae.

6. Spectaculum pulcherrimum ! Egena cogit agmina Inopesque monstrans praedicat: Hi sunt opes ecclesiae.

7. Verae piorum perpetes Inopes profecto sunt opes; Avaras illusus dolet Flammas et ultrices parat.

8. Fugit perustus carnifex Suisque cedit ignibus; Versate me, martyr vocat, Vorate, si coctum est, iubet.