CAPUT XVI.

De visitatione et correctione delinquentium.

Ad haec ministri et fratres ac sorores civitatis et loci cujuslibet ad visitationem communem in aliquo loco religioso vel ecclesia, ubi locum hujusmodi contigerit deesse, conveniant et visitatorem habeant sacerdotem, qui alicujus approbatae religionis existat, quique illis de commissis excessibus injungat poenitentiam salutarem, nec quivis alius possit eis hujusmodi visitationis officium exhibere. Hujusmodi autem visitationis officium semel exerceatur in anno, nisi necessitate aliqua suadente fuerit pluries facienda. Incorrigibiles vero ac inobedientes monitio trina praeveniat. Qui si se corrigere non curaverint, de ipsius congregationis consortio expellantur omnino de consilio discretorum.