58. (5. ) Hymnus sancti Stephani.

1. Quid Stephano potentius? Dicas coronam, martyr est; Hoc est homo, quod praemium, Fructus laboris nomen est.

2. Laus haec brevis prolixa fit, Sic, sic vocantur incliti. Necis minister, aspice, De morte vitam conferens

3. Hoc dat saluti, quod necat. Felix sub istis ictibus Fit sempiternus exitu, Cruore lucem praeparat,

4. Caelum sepulcri munere. Hostem ut triumphus effugat, Ceu palma sic congreditur. Hic primus intravit viam

5. Nullis subactam gressibus, Secreta lustravit poli, In veste carnis abditus Clamavit: Ecce, filius

6. Consistit in dextra patris. Dum saxa ferrent impii, Dum mille leti machinas, Solus bonorum conscius

7. Orabat ex fide loquens, Ne nescientes noxios Caelestis ira perderet. Insons erat vesania,

8. Reum furor provexerat, Per vota currebat labor, Crucem gemebat carnifex Crescente, quem subegerat.