Coll. XXVIII. Qualiter conversandum sit in monasterio sanctae Mariae de angelis, et quod nullatenus a fratribus dimittatur.

Volo, quod iste locus, fraires charissimi, sit semper immediate sub potestate generalis ministri et servi, et inde ille majorem solicitudinem et curam habeat providendi ibidem de bona et sancta familia. Clerici eligantur de melioribus et sanctioribus et magis honestis fratribus et qui sciant melius dicere officium ex illis, qui sunt in tota religione, ut non solum saeculares, sed etiam alii fraires libenter et cum magna devotione videant et audiant eos. De fratribus etiam Iaicis, sanclis hominibus, discretis, humilibus et honestis eligantur, qui serviani illis. Volo etiam, quod nulla persona et nullus frater iniret in illum locum, nisi generalis minister et fratres, qui serviunt illis. Et ipsi non loquantur cum aliqua persona, nisi cum fratribus, qui serviunt illis, et cum ministro, quando visitaverit eos. Volo similiter, quod fraires laici, qui serviunt eis, teneantur nunquam dicere eis verba otiosa vel nova hujus saeculi vel quaecunque alia, quae non essent utilia animabus eorum. Et propterea specialiter volo, quod nullus intret in illum locum, ut ipsi melius conservent puritatem et sanctitatem suam, et quod in illo loco nihil penitus fiat vel dicatur inutiliter, sed ipse locus teneatur purus et sanctus in hymnis et laudibus Domini. Et cum aliquis ipsorum fratrum migraverit ad Dominum, volo, quod loco ipsius mittatur illuc alius sanctus frater a generali ministro. Nam si alii fratres declinaverint aliquando a puritate et honestate et sanctitate vitae, volo, quod iste locus benedictus sit et permaneat semper speculum et bonum exemplum totius religionis et quoddam candelabrum ante thronum Dei et beatam Virginem semper ardens et lucens, per quod Dominus propitietur defectibus et culpis omnium fratrum, atque conservet semper et protegat hanc religionem et plantulam suam. Videte, filii, ne unquam hunc locum relinquatis. Si ab una parte foras expellemini, per aliam reintrate. Nam locus iste sanctus est et habitatio Christi et virginis Mariae matris ejus. Hic, cum pauci essemus, augmentavit nos Dominus altissimus, hic luce sapientiae suae illuminavit animas pauperum suorum, hic igne sui amoris nostras voluntates accendit, hic, qui oraverit corde devoto, quod petierit, obtinebit, offendens gravius punietur. Propter quod, o filii, habete hunc locum omni reverentia et honore dignissimum, tanquam vere Dei habitaculum, ab ipso et ejus matre singulariter praedilectum. Atque ibidem toto corde vestro in voce exultationis et confessionis confitemini Deo Patri et ejus Filio Domino Jesu Christo in Spiritus sancti unitate, amen.