115. Oratio ad eandem.

1. Ave, Birgitta, sponsa Christi,
Tu quae digne meruisti

Sublimari gloria,
Chorus noster te collaudat,
Plebs caelestis te honorat

In caelesti curia.

2. Gaude, mitis et decora,
Sponsum tuum nunc exora,
Ut pronus sit ad veniam,
Nostra felix es patrona,
Artus nostros tu guberna,
Da te quaerenti gratiam.

3. Ave, nostra defensatrix,
Novae legis nuntiatrix,

Novam docens regulam,
Firmum habens fundamentum,
Sanum mentis documentum,

Claram gerens formulam.

4. Gaude quoque tu, Birgitta,
Dei sponsa vere dicta,

Narrans mirabilia,
Bonis, malis consolatrix.
Contra pravos contionatrix

Ostendens terribilia.

5. Ave, felix et beata,
Caritate adornata,

Nostrum dele vitium,
Sensus nostros tu conserva
Contra hostes atque pravos

Nobis fer auxilium.

6. Gaude, o Birgitta mater,
Sancta ter, beata quater,

Memor esto miseris,
Vas virtutum, odor bonus,
Iesu Christi dextra manus

Mundat intus et foris.

7. Ave, sponsa caritatis,
Lumen confer deitatis

Nobis post hoc exsilium,
Deus pater illud praestet,
Duplex mors ne nos infestet,

Et vita est humilium.

8. Tua prece exoratus,

Iesus Christus, eius natus,

Vera virtus atque flamen,
Qui nunc regnat Deus unus,
Nobis praestet suum munus
Meritis Birgittae, Amen.