144. De sancto Aegidio.

1. Christi miles et confessor

Meritis clarissime,
Sis pro nobis intercessor,

Aegidi sanctissime,
Sis languentis salus mentis

Et defensor animae.
2. Ab aeterno praeelectus

In salutem populi,
Casum pensans et defectus

Huius habitaculi
Moves mutes et affectus

In conspectu saeculi,
3, Per te, sancte, qui perfectus

Vixisti per omnia,
Via detur et provectus

In virtutum gratia,
Ne qua nostri nos defectus

Addicat sententia.
4. A primaevo carnis flore

Mundi florem deseris,
Pugna puer gratiore

Carnis motus atteris,
Nisu mentis et amore

Cor habens in superis.
5. Terrenorum da contemptum,

Spem inspirans mentibus,
Ut terrenis cor ereptum

Curis et affectibus,
A quo credit se redemptum,

Sequamur et moribus.
6. Te vocavit et sacravit

Dominus ab utero,
Immo totum vendicavit

Caritas in puero,
Quod in aegro demonstravit

Vestis data misero.

7. Tua nobis prece detur,

Summae vir clementiae,
Ut ab omni mens purgetur

Mundi mala specie,
Et in lapsis reformetur

Vestis innocentiae.
8. De virtute in virtutem

Disponens ascendere,
Dignam Deo servitutem

Laetaris impendere,
Ipsam vitae iuventutem

Commendans ex opere.
9. Ne fallente iuventutis

Lubricae ludibrio
Deviemus a salutis

Repromissae bravio,
Tuae nobis sint virtutis

Exempla praesidio.
10. Te percussa a serpente

Pium sensit medicum,
Sentiamus et nos mente,

Ne per carnis lubricam
Voluptatis virulentae

Prodeant in publicum.
11. Ne virtutem venditares

Vilis famae pretio,
Famam fugis, ut declares,

Quae mentis devotio,
Quae sit inter salutares

Operis intentio.
12. Caput nolens impinguari

Peccatoris oleo,
A favore saeculari

Sive luxus laqueo
Loco gaudes elongari

Situque corporeo.

13, Sed quod verbi salutaris
Vita germen proferat,

Non id aurae popularis
Favor vagus efferat,

Non se pompae saecularis
Tumultus interserat.

14. Nescit ardens occultari
Lucerna sub modio

Nec vir sanctus non laudari
Secedens in medio,

Spem in vero salutari
Ponens, non in alio,

15. Ad relicta ne redires
Exsul voluntarius,

Ne deserta fastidires
Vivens solitarius,

Administrat viro vires
Comes Veredemius.

16, In hac vasta commorantes

Vallis solitudine,
Tibi, sancte, supplicantes

Consolando sustine,
Ne divino deviantes

Priventur solamine.

17. Quammiranda,quamlaudanda

Salvatoris gratia,
Nutu suo tanta duo

Iungens luminaria,
A remotis et ignotis

Locis concurrentia.

18. Ut amore vel honore

Se passim praeveniant,

Ut alternis ex ardore
Vires flammae capiant,

Repercusso se fulgore
Vicissim irradiant.

19. Horum licet a remotis
Sequentes vestigia,

Supplicamus, ut amotis
His, quae sunt contraria,

Preces iungant pro devotis,
Quos par iungit gloria,

20. Flos Aegidi confessorum,

Tanto felix socio,
Fac nos tecum beatorum

Adiungi collegio,
Ubi merces est sanctorum

Plena Dei visio.