160. De s. Iohanne Evangelista.

1. Gaude, praedilecte Dei,
Tu, Iohannes, Zebedaei

Natus, nactus gratiam,
Christo, care, nos coniungas
Et a nobis nunc disiungas

Omnem iniustitiam.

2. Gaude, quia paruisti

Christo, post quem cucurristi

Mox relictis retibus,
[Fac me Christo sociari)
Semper et sic adornari
Gratiae virtutibus.

3. Gaude, quia transformatam
Et in monte demonstratam

Vides Christi faciem,
Sub te duce tam securo
Fac nos Christum in futuro

Videre et speciem.

4. Gaude, tantum tu dilectus
Quod in cena supra pectus

Quievisti Domini,
Per hunc somnum specialem
Tu quietem aeternalem
Impetra nunc homini.
5. Gaude, custos matris Christi,
Quae de cruce voce tristi
Tota tibi traditur,

Tuae curae nos commenda,
Nos et matri recommenda,

Quae sic tua dicitur.
6. Gaude, Christi pugil fortis,
Qui non times poenas mortis

Nec dulcorem senseras,
Fac nos mortem non timere,
Nos in fine tu tuere,

Qui sic Satan superas.
7. Gaude, virgo semper manens,
Agnum sequens atque canens

Nunc in choro virginum,
Nos a malis hic mundatos,
Duc ad Deum et beatos

Fac post vitae terminum.