162. De sancta Margareta.

1. Gaude, virgo Deo grata,
Margareta, numerata

Cum sanctis virginibus,
Per te nostra nunc peccata
Relaxentur et mundata

Mens sit a sceleribus.

2. Gaude, fide roborata,

Minas spernens et mandata,

Quae iussit Olybrius,
Per te fides confirmata
Nunc in nobis et ornata

Vita sit virtutibus.

3. Gaude, poenis lacerata,
Dam pro Christo cruentata

Fuisti verberibus,
Fac, ut Deo dedicata
Sit in poenis et parata

Mens in Dei laudibus.

4. Gaude, dum incarcerata
Manes et post liberata

De draconis faucibus,
Nobis assis invocata
Et ad regna duc beata
De carnis carceribus.

5. Gaude, pie visitata
Per columbam, confortata

Tuis in doloribus,
Per te fiat plebs purgata,
Sancta, simplex, sociata

Supernis splendoribus.

6. Gaude, quod non conflagrata
Flammis sis nec suffocata

Sub undis maioribus,
Per te sit refrigerata
Flamma carnis et levata

Mens a malis moribus.

7. Gaude, tandem coronata,
Dum pro fide decollata

Iungeris martyribus,
Tu nunc Christo copulata
Fac, ut caeli sit donata

Lux te collaudantibus.