163. De s. Maria Magdalena.

1. Gaude, magna Magdalena,
Tu, Maria, tota plena

Gratiarum opere,
Nunc fac nobis Christum carum,
Nos ut donis gratiarum

Ditet suo munere.

2. Gaude, rore sic respersa
Caeli, postquam es conversa,

Quod sis tota vivida,
Nostrae menti mitte rorem,
Quo virescat ad valorem,

Ne sit semper arida.

3. Gaude, lugens quae sanabas
Pedes Christi, quos rigabas,

Respergendo lacrimis,
Quidquid vidit visus vanum,
Tuis fiat semper sanum
Precibus piissimis.

4. Gaude, cuius est unguentum
Deo dans odoramentum,

Dum perungis Dominum,
Per te remittat reatum
Omnem, qui per odoratum

Vasis nocet hominum.

5. Gaude, Deo discumbenti
Praesens astans et edenti

Deferens obsequia,
Firma frenum nunc in ore
Nostro, nos ut sancto more

Sumamus cibaria.

6. Gaude, quia tetigisti
Dei pedes et dedisti

Pia pacis oscula,
Quod in nobis est infectum
Nostro tactu, tu fac rectum
Carnis frangens iacula.

7. Gaude, tandem cum audisti
Dimitti, quod deliquisti,

Data tibi venia,
Quidquid per auditum, tactum,
Visum, gustum et olfactum

Fit, formes in gratia.