166. De s. Thoma Cantuariensi.

1. Gaude, martyr gloriose,
Thomas, primas pretiose,

Praesul Cantuariae,
Tu nos tua passione
Consoleris in agone

Mortis et maestitiae.

2. Gaude, sedem praesularem
Qui rexisti principalem

Regni strenuissime,
Tu nunc rege nostrum statum,
Per te finem ut beatum
Sumamus sanctissime.

3. Gaude, quia domuisti
Carnem, clam dum induisti

Monachi cilicium,
Fac nos corpus castigare
Semper et continuare

Bonum exercitium.

4. Gaude, graviter vexatus,
Dum per regem exsulatus

Eras pro iustitia,
Per te [omnes] redeamus
Nos, qui procul exsulamus

Nunc a poli patria.

5. Gaude, nam te confortavit
Christus et certificavit

De tuo martyrio,
Nos nunc sibi fac servire
Mortem semper et sitire
Suo pro servitio.

6. Gaude, tandem immolatus
A malignis et mactatus,

Dum oras pro ovibus,
Pro tam magna caritate
Nobis in necessitate

Persiste petentibus.

7. Gaude, quia morbi cedunt,
Signa signis dum succedunt,

Quae dant tibi gloriam,
Salva semper te laudantes,
Thoma, tui memorantes
Agonis historiam.