185. De ss. Iustina et Cypriano.

1 a. Ascendamus ad honestum,
O dilecti, diem festum
Hunc Iustinae virginis,

1b. Cuius vita gloriosa,

Cuius mors est pretiosa
In conspectu numinis.

2 a. Dona quaerens potiora,
Virgo prudens et decora,
Hedesii filia,

2 b. Vita vixit angelorum,

Modo tenet Christi thorum
In caelesti patria.

3 a. Haec Christi gratiam

Discens per proelium
Matrem Cleoniam
Vocat ad filium.

3 b. Pater ab angelis

Et Christo monitus,
Per manum praesulis
Sanctis est additus.

4 a. Post haec templum frequen-
tatur,
Sic a turpi adamatur
Agladio turpiter ;

4 b. Sanctam petit in uxorem
Sed ad vim et ad furorem
Restitit viriliter.

5 a. Plenus malitiis
Atque flagitiis
Daemoniis tribus
Virginem fortibus
Temptat Cyprianus.

5 b. Pharmacum spargitur,
Sed crux imprimitur,
Hostis expellitur,
Magus convertitur,
Stat in fide sanus.

6 a. Praesul factus sanctam ipsam
Dominam et abbatissam
Constituit virginum.

6 b. Ille multis praedicabat,
Haec multos illuminabat
Convertens ad Dominum.

7 a. Sanctum iussit,tunc suspendi
Et Iustinam male caedi
Comes Eutulinius,

7 b. Praesulem exungulari
Virginem exalapari
A spiculatoribus.

8 a. Sed cum grates dant in caelis,
Comes durus et crudelis
Iussit tamquam infidelis
Fieri sartaginem:

8 b. Quae cum fuisset succensa
Pice, adipe ac cera,
Mitti praecepit in ea
Praesulem ac virginem.

9 a. In qua manent illibati
Et in nullo violati ;
Sed post haec sunt decollari,
Sic a Christo coronati
Urbe Nicomedia.

9 b. Inde Romam sunt delati,
Demum inde sunt translati
Et in crypta tumulati
Corpus sanctae, caput sancti
In urbe Placentia.

10 a. O Iustina, vas honoris,
Honestatis ac pudoris,
Cypriane, vas decoris,
Incorrupti flos odoris,
Formam datis saeculo.

10 b. Cypriane, o disserte,
O Iustina, nobis certe
Caeli portae sunt apertae,
Opem vestram nobis ferte
Iuncti cum theognito.