246. De sancta Agatha.

1. Ave, pulchra Christi sponsa,
Agatha, quae sicut tonsa
Ovis feta scandens lota
Iam explesti tua vota.

2. Clara nata parentela,
Valde prudens in loquela,
Inter Catanenses cives
Fama rebusque praedives.

8. Virgo voltu es venusta,
Sed ancilla Christi iusta,
Ex illius servitute
Summe claram probans tu te.

4. O quantus dulcor te fovet,
Quam a Christo nihil movet,
Quam non mutant blandimenta
Neque minae nec tormenta.

5. Spernens suasum impudicum,
Blandimentum meretricum,
Gaudens sic incarcerari
Quasi laute convivari.

6. Heu, dolorem fers amarum
In tortura mamillarum,
Tyrannus in te destruxit,
Quod in matre ipse suxit.

7. Nuda super testas fractas
Volutaris igne actas,
Dira haec et inconsueta
Pertulisti mente laeta.

8. Quantum places sponso tuo,
Probant in te signa duo,
Nam summus apostolorum
Curat te a vi dolorum,

9. Quem de caelis ad te misit
Et libenter te invisit
Ut dilectam suam natam
Et ut sponsam regis gratam.

10. Angelorumque conventum
Misit ad te bene centum,
Qui de darent sepulturae,
Tantae eras sibi curae.

11. Pandunt magnam sanctitatem
Patriaeque libertatem
Angeli hunc per honorem,
Monstrant suam te sororem.

12. O patrona curialis,

Precor, serva me a malis,
Fac mamillas intellectus
Intus semper et affectus

13. Me servare incorruptas
Quasi soli Deo nuptas,
Quibus omnes sensus meos
Pascam delectando eos,

14. Pulchra Dei contemplando,
Iussa eius auscultando,
Adorando vitam Christi,
Ut. conformer semper isti,

15. Hunc gustando cum dulcore
Et tangendo cum amore,
Ut sic crescam in salutem
Ad aeternam iuventutem,

16. In qua semper tu laetaris
Cum amicis Dei caris
Cantans dulce modulamen
In chorea caeli. Amen.