255. De sanctis Angelis.

Preces nostras, rogo, pia,
Audi, vera tu sophia,
Quas in laude angelorum
Tibi fundo beatorum.
5. Omnes nos, qui sumus multi,
Petimus, ut circumfulti
Interventu Michaelis
Nos, Christe, tuere velis
In huius mundi proelio.

10. Ad te, Christe, suspiramus,
Sic in valle hac vivamus,
Ut conformes tibi luci
Mereamur ad te duci
Manu sancti Michaelis,

15. Summi principis in caelis,
Qui pro nobis fertur stare
Et constanter dimicare
Contra impetum draconis,
Regis diri Babylonis,

20. Qui conatur supplantare
Iustos ipsos et vorare,
Quos caelesti regno privat,
Cum illos fraude captivat ;
Cuius tu ferocitatem,

25. Michael, et potestatem
Dei ex virtute frenas,
Ne ad infernales poenas
Pios quosque trahat secum ;
Ergo deprecamur tecum

30. Omnes choros angelorum,
Paranymphe sancte, quorum
Princeps es, ut consurgatis
Et ab hoste defendatis
Nos, qui semper impugnamur

35. Et interdum debellamur,
Non habentes defensores,
Nisi vos propugnatores.

Propugnate, custodite
Et salvando subvenite

40. Nobis ope destitutis
Et de vita male tutis
Propter hostes imminentes
Et ad culpam nos trahentes.
Ecce, hostes furibundi,

45. Mortis nostrae sitibundi,
Corporales et invisi
Nos circumdant sic, quod, nisi
Ad nos, sacer dux, de caelis
Cum caterva tua velis

50. Gratiose declinare,

Succumbemus neque stare
Quimus belli tempestate
Tam gravi necessitate.
Omnes autem, quotquot estis,

55. Quos ad nostrum rex caelestis
Famulatum deputavit
Nosque vobis commendavit,
Adiutricem porrigatis
Manum nobis sauciatis.

60. Seraphim, vos invocamus,
Cherubim, et vos oramus,
Omne quoque angelorum
Agmen et archangelorum,
Thronos et dominationes

65. Virtutumque legiones,
Potestates, principatus,
Ut mens, corpus, vitae status,
Motus, sensus tueantur
Nostri per vos et regantur.

70. Sic nos vobis sociari
Mereamur, speculari
Vultum summae trinitatis
Post hanc vitam cum beatis.