260. De sancto Augustino.

1. Iucundat iam ecclesia
Per gaudiosa gaudia,
Malis stipata punica
Per Augustini dogmata,

2. Diversa cuius carmina
Nunc ardent velut facula
Et absque omni macula
Lucent per cuncta saecula,

3. Et vineam fructificant
Colonosque laetificant,
Diversos dum inebriant,
Iucundos Christo faciant.

4. O Augustine, florum flos,
Cuius odor demulcet nos
Per fidem ut caelestis ros
Confortat et catholicos.

5. Confusa est perfidia
Et perfida invidia,
Nam fidei acidia
Confluxit ad praesidia.

6. Plenus tu rore pneumatis,
Diffusus es pro ceteris
In novis et in veteris
Coruscas et in mysticis.

7. O summi Dei famulus,
Collaudat te catholicus,
Cuius nos dulcis iubilus
Devotos reddat caelitus,

8. Ut per tua dogmata
Sequamur regni praemia
Per tua et suffragia
Iucundemur in saecula.