262. De sancta Barbara.

1. Barbara, virgo, flos florum,
Speculum virtutum, morum
Doctrix, exemplar decorum,

Tota mitis, humilis;
Amore Christi succensa
Tormenta vincis immensa,
Gratia gaudes impensa

Meritorum cumulis.

2. Rea non sit mihi vita,
Anima fleat contrita
Scita culparum oblita

Tuis sacris precibus;
Bona queam consummare,
Scelus mortale vitare,
Lacrimis lectum lavare
Criminum a faecibus.
3. Aridam mentem asperge,
Naevum delictorum terge,
Me vulneribus immerge
Redemptoris Domini:

Respice me sauciatum,
Mole carnis adgravatum,
Multis malis circumdatum,

Quae occurrunt homini.
4. Adesto mortis in hora,
Ne luam mala peiora,
Pro me Dominum exora,

Ut felix sit exitus.
Vocem audiam: venite,
Benedicti patris rite,
Possidete regnum vitae;

Talis detur transitus.
5. Gladio quae transivisti,
Me salves a morte tristi
Praesentiae iunge Christi

Peracta victoria;
Offer me caelorum portae,
Locatus sim in cohorte
Sanctorum felici sorte

In perenni gloria.

Locum nostrum tu dignare
Cum personis reservare,
Fac nos Christum collaudare
Sedula memoria.