279. De ss. Evangelistis.

1. O evangelistae grati,
Patres mei praeoptati

In cordis promptuario,
Dictis, scriptis estis rati,
Multis modis praesignati

Numero quaternario.
2. Quattuor per documenta
Paradisi vos fluenta

Totum orbem perfunditis
Totque fabri sacramenta
Vos formantes et figmenta

Errantium confunditis.
3. Quattuor ad omnes gentes
Auri circuli ferentes

Arcam legis opificis,
Tot et ordines fulgentes
Gemmis vestem polientes

Altissimi pontificis.
4. Totque terrae vos minora
Sed et sapientiora

Ceteris sapientibus,
Tot vos difficiliora
Ad plenum in nulla hora

Noscenda cunctis mentibus.
5. Tot et ianitores stantes,
Domum Dei conservantes

Ab impetu crudelium,
Tot columnae hanc portantes,
Tot venti vivificantes

Animas infidelium.

6. Totque viri vos in igne
Deum collaudantes digne

Tot vosque animalia,
Pulchraeformae tam benignae,
Quod virtutum per insigne

Sunt nunquam visa talia.
7. Matthaee homo divine,
O tu Luca vituline,

Me pauperem attendite,
O tu Marce leonine,
O Iohannes aquiline,

Me regite, defendite.

8. Ut homo discretione,
Bos carnis mactatione

Fiam in cunctis gestibus,
Leo in temptatione,
Avis contemplatione

Cum veris Christi testibus.
9. In scribendis Christi gestis
Verbis, signis manifestis

Vos summi cancellarii,
Vestris scriptis praebonestis
Ad festa regni caelestis

Vos nostri veredarii.
10. O quadriga, salvandarum
Felix vectrix animarum,

Per triste mundi spatium
Vehite me vestrum carum,
Ubi nihil est amarum,

Ad caelicum palatium.