285. De s. Gregorio Martyre.

1. Pie praesul, o Gregori,
Qui non recursabas mori,
Multas plagas pertulisti
Propter nomen Iesu Christi.

2. Regyratus dorso fracto
Non es motus in hoc facto
Ac in ventre dissipatus
Mori pro Christo paratus.

3. Manibus, pedibus ligatus
Es in craticulam prostratus,
Sed dum supponitur ignis,
Terror magnus fit malignis.

4. Nam ex magno motu terrae,
Quem civitas nequit ferre,
Ex magna parte corruit,
Trecentos et plus oppressit.

5. Post carceri es mancipatus
Et ab angelo consolatus,
Sed eductus a carcere
Laudasti regem gloriae.

6. Variis poenis vexatus,
In fide Christi probatus,
Demum capite truncatus,
Sic ad caelos es vocatus.

7. Fortis Christi agonista,
Nos in valle sumus ista,
Sis protector noster fortis
Contra pestem iuge mortis.

8. Nos tuere, praesul pie,
Fructum virginis Mariae
Ante mortem da gustare,
O Gregori, Christi care.

9. Hi qui colunt tua festa
Venerando tua gesta,
Illos hic Christi famulus
Custodi horis omnibus.
10. Post hanc vitam tuta via
Tua duc nos prece pia,
Ut det nobis post tristia
Iesus beata gaudia.