289. De sancto Hieronymo.

1. O doctorum doctor, ave,
Servulorum imo fave,

Ieronyme, mi domine,
Acceptetur hic benigne,
Quamquam detur laus indigne

De peccatorum homine.

2. Si indignus aut peccator,
Non malignus is laudator

Dici queat iuridice,
Nam, ut laudet, inquam, reus,
Mori gaudet homo Deus,

Quod creditur veridice.

3. Vermis rana dura coaxat,
Non spe vana linguam laxat

Cum angelis hymniferis,
Exstinctus sic carbo linquo
Exstinctos et appropinquo

Carbonibus igniferis.
4. Dat gradum aequalitatis
Mulierum maior natis

Tibi secum in praemio,
Te fert sibi considere,
Pari luce refulgere

In paradisi gremio.

5. Quod beatus Augustinus
Et Cyrillus, vir divinus,

Censerunt mirabiliter,
Nec mirandum, quod aequantur
Pugiles, dum praemiantur,

Qui certarunt similiter.
6. O aurora, quam decora
Stillans rorem, per quem florem

Virtutum concipio,
Da florere et frondere,
Ferre fructus, tuos ductus

Sequens non desipio.
7. Cardinalis ens in Roma
Spirans lateque theoma

Fers aemulorum furias,
Ad desertum inde gressus
Inhumanas es perpessus

Ibi carnis iniurias.
8. Macerata haec te teste,
Cilicina tecta veste,

Nudae humo alliditur,
Post squalescens et arescens
Nigra pellis de flagellis

Tuae manus inciditur.
9. Quis divinis in doctrinis
Exponendis, transferendis

Et in tot linguagiis
Tam profundus, tam facundus
Aut in tota mundi rota

Tantus in suffragiis?
10. Monialis saevis malis

Dum temptatur, obumbratur

Vi tuae imaginis,
Fratrem plane de germanae
Stupri felle contra velle

Salvas et voraginis.

11. Fremens leo mansuefactus
Pro medela ad te tractus

Pedibus pro volvitur,
Sumpta cura duratura
Servitute pro salute

Merces tibi solvitur.
12. Claustri muris ruituris
Tis devotam hinc amotam

Solam servas de ceteris,
Exstinguis Sabinianum
Blasphemosque, sed filiarum

Pulchre solvis, dum peteris.
13. Cur, baptistae par, assiste,
In honore qui labore

Es huic comparabilis,
Postulato, ne irato
Iudicante Dei nato

Inveniar damnabilis.

14. Dato, pie, ut in die
Tam poenali tribunali

Astem securissime,
Hoc adverte dari per te,
Postulatur quidquid, certe

Rex iubet citissime.

15. Hinc sripturis de obscuris
Intellectum da perfectum

Cum sapore sugere,
Exquisita stare vita,
Motus luxus, bona fluxus
Et excessus fugere.
16. Esto fortis hora mortis,
Ne in manum duram canum

Ruam infernalium,
Expers luctus per te ductus
Stem in choro praefulgoro
Laudum perennalium.