296. De sancto Ioseph.

1. Ioseph sancte et fidelis,
Cuius laudes sunt in caelis,
Ecclesia te commendat,
Curia caelestis laudat.

2. Ioseph castus, timoratus,
Virtuosus nominatus,
Te populus catholicus,
Caeli laudat exercitus.

3. Ioseph, Davidis filius,
Tu Iesuli nutricius,
Tua sancta praeconia
Signavit virga florida.

4. Ioseph, sponsus matris Christi,
Cui solus adfuisti
In omni necessitate
Vitae castae puritate.

5. Ioseph, pater salvatoris
Putativus, intus, foris,
Cui thesaurus absconditus
Creditus Dei filius.

6. Quem concepit florum flos
Sicut rosam caeli ros
Et tangit sine macula,
Munda manet in saecula.

7. O custos huius virginis,
Divinitus prae ceteris
Electus atque dilectus,
Iustus, bonus, pius, rectus,

8. Ora deitatis natum
Pro salute nobis datum,
Ut post huius vitae statum
Finem nobis det beatum.

9. Ora matrem deitatis,
Florem iuge puritatis,
Ut det nobis cum beatis
Lumen verae claritatis.