297. De sancta Katharina

1. Gaude, sancta Katharina,
Es conversa vi divina
Miro modo [te] vagante,
Regnum tuum perlustrante.

2. Gliscens curiose clare
Universa explorare,
Tandem ad cuiusdam senis
Heremitae casam venis.

3. Qui suscepit te gaudenter,
Colloquendo condecenter
Pulchre suasit te nupturam
Ob tam magni regni curam.

4. Tuus sermo fit mox iocus,
Iubes tu: sit ipse procus,
Si sit sponsus amabundus,
Erit mihi vir iucundas.

5. Forma sensu sic micabas,
Nullum dignum te putabas,
Sed haec dicta tam iocose
Senex sumpsit seriose.

6. Ne tam pulchrum Dei plasma
Satan fieret phantasma,
Ipse spondet, tu discedis,
Ipse orat, tuque credis.

7. Poscens sponsum mox pre-
catum
Dixit: satis est iocatum,
Cuncta vana, virgo, desint,
Culti gestus, mores praesint.

8. Ne verbis displiceatis
Sponso summae claritatis,
Forma vincit omnes solus,
Non fert parem terra, polus.

9. Tunc correpta es timore,
Tota languens in amore,
Clamas: diu cur protelas,
Quod hunc mihi non revelas ?

10. Veniat, ut eum cernam
Et propter se cuncta spernam,
Tunc processit sponsus carus
Sicut sol prae cunctis clarus.

11. Dicens: o tu Katharina,
Elevans te a ruina,
Vidistine pulchriorem,
Clariorem, dulciorem?

12. Mea forma tibi placet
Iam, sed tua vilis iacet,
Quamdiu non baptizaris,
Mihi grata non putaris.

13. Illo caelum ascendente
Baptizata fis repente,
Sic ad fidem es inducta,
Fortior in pugnae lucta.

14. Undecumque effulsisti

Ceteris prae nymphis Christi,
Gradu, statu altiores
Habens semper obiectores.

15. Quinquagenos oratores
Prae cunctis subtiliores,
Reginam imperialem,
Summam hostis conthoralem,

16. Clarum ducem et ducentos
Milites sub eo tentos,
Omnes bene hos vincebas
Martyresque faciebas.

17. Sed ferum imperatorem
Viceras miseriorem,
Eius minas contemnendo
Poena laeta patiendo.

18. Flagra, vincla, fames, rota,
Mucro super te sunt mota,
Haec, o virgo tu regalis,
Tenera et curialis,

19. Patienter sustinebas,

Sic et hostem plus pungebas,
O beata Katharina,
Virgo martyr et regina.

20. Probat sponsi vox potentem,
Te mons Sina sapientem,
Angeli te castam, diam,
Liquor tumbae valde piam.

21. Hinc tu potens me defende,
Dogma prudens tu impendo,
Fac me castum tu, o casta,
Pia, mihi pie asta.

22. Sint res, fama, mors et vita
Semper per te custodita,
Post me duc ad iubilamen
Ante vultum Dei. Amen.