324. De sancta Sophia.

Salve, sancta o Sophia,
Matrona dulcis et pia,
Quae virtutes cardinales
Sanctis angelis aequales
5. Christo sponso genuisti.
Quas timore nutrivisti,
Fidem, Spem et Caritatem,
Quae oderunt pravitatem;
Quas exposcit Adrianus,

10. Mente vecors et insanus,
Propter pulchritudinem
Et teneritudinem
In filias adoptare
Et maligno sociare.

15. Quem piae tres sorores
Ut candidati flores
Recusant ut foetorem
Secundum castum morem.
Tunc Fides iussu praesidis

20. Suis praecisis mamillis,
A triginta militibus
Caesa, repleta vulneribus,
Lac stillat de vulneribus,
Dat. laudem Deo populus.

25. Gaudet Fides et fidelis
Laudat Dominum de caelis.
In craticulam extenditur,
De qua illaesa progreditur,
Sartagine volutata

30. Fides manet illibata,
Oleo et perfunditur,
Nec Fides sic confunditur.
Post haec mater decollata
Capit Christum fide grata.

35. Tunc sacra Spes producitur,
Ab iniquis illuditur,

In sartagine proicitur
Sic et adipe perfunditur,
Cera, resina adiungitur,

40. Et sacra virgo non flectitur.
Puella truncatur gladio,
Fit spectaculum hoc populo.
Iubetur assisti Caritas,
Crudelis quam immanitas

45. Tyranni nequam non adplau-
dit,
Cui virgo non obaudit.
In catasta est extensa,
Dira passa est tormenta.
Cum recusat hanc laudare,

50. Cui laudem non est dare,
Magnam proferre Dianam,
Impudicam et insanam,
In caminum est eiecta,
In quo sponsa tam dilecta

55. Laudat regem saeculorum
Cultum spernens idolorum.
Flamma de camino erupit,
Vorans sex milia occidit,
Illaesa virgo conservatur,

60. Ignitis furcis perforatur
Et sic coronam meruit,
Quae fide fidelis fuit.
Dilecta Sapientia
Et pia mater inclita

65. Sacras virtutes condidit,
Quae virtuosa exstitit
Et mentis desiderio
Et in amoris gaudio
A castitatis filio

70. Cum natis esse postulat,
Cum quibus nunc laeta regnat.

Beata Sapientia,
Vera salute florida,
Te thronus fert angelicus
75. Tribus iunctus virtutibus,
Quas Christo sponso nutrivisti,
Hic cum in terris exstitisti.
Cum tuis natis, mater pia,
Dilecta Deo o Sophia,

80. Pro me Dominum deprecare,
Ut me velit adiuvare,
Mentem meam illustrare
Atque vitam adornare
Cum tribus his virtutibus,

85. Ut post Dei obtutibus
Iucunder in caelestibus
Adiutus vestris precibus.