325. De sancto Stephano.

Sancte Stephane, martyr Christi,
Qui primus esse meruisti
Sanguinem pro Christo fundi,
Qui tulit peccata mundi:
5. Exaudi nunc me miserum
In peccatis deperditum,
Summi regis natum
Graviter prostratum,
Tot vitiis vulneratum,

10. A daemone captivatum.
O martyr Christi Stephane,
O martyr invictissime,
Manum tuam porrige,
Me clementer erue

15. Hic de faucibus draconis
Ditans caelestibus donis.
A peccatis me defende

Et Christum mihi ostende,
Quem vidisti caelo stantem,

20. Circa patrem ambulantem,
Cuius pia defensio
Exspectans te cum gaudio.
Victor invincibilis
Ultorque terribilis,

25. Pro iniquis exorasti,
Exemplum nobis donasti,
Ut inimicos diligamus
Et sic aeterna capiamus.
Hic sic vivam, pro me ora,

30. Ut laetus in mortis hora
Dicam: spiritum, Iesu bone,
Meum recipe in agone,
Ut, ubi Stephanus nunc gaudet,
Cum sanctis angelis te laudet.