348. De sancta Margareta.

la. Ecce, dies attollenda,

Dies votis prosequenda,

Dies plena laetitia.

1 b. Nos hanc diem veneremur,

In qua sanctae praestolemur

Virginis suffragia.

2 a. Haec beata Margareta,

Generosa stirpe nata,

Gratiosa pollens vita,

Dotata dulcedine.

2 b. Hanc praefectus adamavit,

Eam sibi accersivit,

Sociari [hanc] voluit

Visa pulchritudine:

3 a. Si libera, in uxorem,

Si ancilla, concubinam,

Sic mea permaneat ;

3 b. Si nobilis et virilis,

Aut si condicio vilis,

Si utrumque habeat.

4 a. Tunc praefectus Olybrius

Est turbatus ut ebrius,

Meditatur ut acrius

Praefurens insania.

4 b. Illa Christum profitetur,

Ipsa palmam promeretur

Nec carcerem reveretur

Firmata constantia.

5 a. Statim iubet hanc recludi,

Duris loris mox vinciri

Atque eam cruciari

Et in arta detineri

Carceris custodia.

5 b. Non consentit adorare

Neque diis deservire ;

Sicque iubet laniari

Eiusque membra torqueri ;

Magna est insania.

6 a. Mortem Christus non renuit,

Pro me mori sic voluit,

Sua morte vitam dedit,

Quod diu desidero ;

6 b. Eius amore accensa

Caritate inflammata,

In affectu tota rapta

Prae amore ardeo.

7 a. Nec se capit Olybrius

Et a mente alienus

Meditatur liberius

Videns pulchritudinem.

7 b. Hanc videntes flagellari

Sic deflebant cruciari

Et decore spoliari

Sanctam Dei virginem.

8 a. In eculeo levatur

Atque dire sauciatur

Et acriter flagellatur,

Nititur consummari.

8 b. Ferreis pectinibus

Iussit caram omnibus

Et duris verberibus

Sanctam laniari.

9 a. Manai sanguis circumquaque

Parte fluens ex utraque

Velut unda, velut rivus,

Sicut prorumpens fluvius.

9 b. Ipsam videns laniari

Nec a fide dimoveri

Neque tamen immutari,

Sic torquetur acrius.

10 a. O quale consilium I

Nolo vestrum consortium

Recedite et abite ;

Est perversa monitio.

10 b. Haec, inquit, laniatio

Est corporis afflictio,

Et carnis cruciatio

Est animae salvatio.

11 a. O canis impudens,

Dire leo frendens !

Para aculeos

Et dentes ferreos

In sanctam virginem ;

11 b. Vires tuas enervasti,

Robur tuum confregisti,

In certando defecisti

Neque tamen potuisti

Evincere fragilem.

12 a. Sterne, daemon tu superbe,

Cur insurgis tam acerbe,

Qui feminam non vicisti,

Cuius virtutem sensisti?

12 b. Statim miser evanescit,

Postquam abire concessit

Virgo, nam divina victus

Est virtute inimicus.

13 a. Caput premit haec draconis

Et in procinctu agonis

Percussus ictu mucronis,

Toto prostratus corpore.

13 b. Videt humi procumbentem,

Sternit pede haec iacentem,

Hanc vorare cupientem ;

Toto confractus vulnere.

14 a. Statim efficitur

Secura puella,

In se laetabunda

De hac victoria,

Quae fortem vicerat.

14 b. Principem vicerat

Virtute divina

Nec posse valuit

Virtute humana,

Ministrum superat.

15 a. In horrendo carcere

Tandem virgo misere

Ingreditur libere,

Mira refulget claritas.

15 b. Certat virgo cum dracone ;

Superatur in agone

Et vincitur a virgine

Draconis crudelitas.

16 a. Beata virgo facibus

Ustulatur ardentibus,

Ne aeternis ignibus

Cremetur in futuro.

16 b. Aufer motus insurgentes

Nostrae carnis prurientes,

Ne patiantur ardores

In alio saeculo.

17 a. In dolio gelidarum

Corpus ponitur aquarum,

Dolor crescat quo poenarum,

Tormenta sustineat.

17 b. Egreditur sana,

Tunc tremuit terra,

Plebs incredula

Ut fidem habeat.

18 a. Pro salute sua orat

Et pro perversis supplicat,

Ut signis memor nominis

Sentiat vim numinis ;

18 b. Nullus a te expellatur,

Immo magis adiuvetur

Virtute tui luminis,

Redeat incolumis.

19 a. Dolor partus suae prolis

Gravat artus genetricis,

Incutit suspiria ;

19 b. Se sentiat liberatam,

Ab onere absolutam

Post tanta martyria.

20 a. Memor esto nostrae sortis,

Dum venerit hora mortis,

Ne noceat noster hostis,

Astra petat spiritus.

20 b. De profundo vitiorum

Duc ad regna beatorum,

Et in coetu electorum

Conquiescat animus.

21a. Lictor vibrat gladium,

Martyr offert iugulum

Aeternum quaerens epulum

In caelesti gloria,

21b. Ubi quies, ubi vita,

Ubi cuncta sunt unita

In gloria infinita

In sempiterna saecula.