99. (1. ) In Nativitate Domini.

Versus ante Episcopum.

1. Gloriam Deo in excelsis hodie

Caelestis primum cecinit excercitus, Pax angelorum et in terra vocibus Vera descendit.

2. Hodie caeli facti sunt melliflui,

Et mare dulces undas blando gurgite Aequavit lento respirante sibilo Flatu sereno.

3. Astra polorum rutilanti radio

Subfusa lactis irrorant dulcedinem, Totus exsultat laetabundo gaudio Gavisus mundus.

4. In hora, quando Iesus Christus Dominus Nasci dignatus est sacra de virgine, Dulcis, suavis ac desiderabilis, Bethlem in urbe.

5. Angusti cunas pertulit praesepii, Foeno iacere non abhorret Dominus, Summa qui patris sedebat in dextera, Rex angelorum.

6. Pannis velatus, vili strictus fascia, Inclusus parvis lacrimabat cunulis, Mater beata sancta premit ubera De caelo plena.

7. Sanctus sacratae fecundavit spiritus

Virginis vulvam, verbum caro factum est, Et habitavit in nobis omnipotens, Filius Dei.

8. Gabriel ante te praedixit angelus, Quando felicem salutavit virginem. Paries, inquit, filium, Emmanuel Nomen habebit.

9. Pastores erant proximis in pascuis Bethlem ad urbem, noctis sub silentio Instabant suos supra greges vigiles; 0 quam beati !

10. Claritas Dei cinxit illos fulgida; Angelus inquit: nolite pavescere, En, ego modo magnum namque gaudium Nuntio vobis,

11. Erit quod omni saeculo mirabile, Hodie quia vobis Christus Dominus Natus est Bethlem, Davidis in oppido, Salvator mundi.

12. Hoc vobis signum erit: in praesepio Infantem pannis involutum positum Invenietis cum Maria pariter, Matre beata.

13. Subito facta fulgentis militiae Est multitudo caelestis exercitus Eodem simul angelo cum flammeo Valde praeclara.

14. Gloria Deo in excelsis sidera

Plena sonabant, pax et in hominibus Auditur bonae voluntatis vocibus In terra sanctis.

15. Pastores namque loquebantur invicem: Eamus usque in Bethlem celeriter Et videamus hoc de verbo, qualiter Angelus dixit.

16. Venerunt ergo, invenerunt puerum, Angelus sicut dixit, in praesaepio Positum, sanctam genetricem virginem, Ioseph praesentem.

17. In caelo stella novo clara radio

Refulsit, ante quae nunquam resplenduit, Clarior cunctis astris, mundo nuntians Gaudium magnum.

18. Hanc stellam magi fulgore perspicuo In oriente viderunt resplendere: Hoc signum, fantur, tam famosum, nobile Regis est magni.

19. Eamus ergo, inquiramus, ubi est, Et offeramus illi saltem munera Nostris oblata de thesauris optima, Aurum, tus, murram.

20. Haec tria magnum demonstrant mysterium Dona, quae Deo hominique dederant Tres magi, sancto perdocente spiritu More divino.

21. In auro regis signat excellentiam, In ture summum sacerdotem typicat, Per murram Christi sepulturam mystice Optime docet.

22. Ecce, venerunt magi Hierosolymam Dicentes: Stellam vidimus perfulgidam In Oriente; ubi est, qui natus est, Rex Iudaeorum?

23. Herodes magno timore perterritus Revolvit sacras prophetarum paginas Praecepit scribis: Legite, si verum est, Scriptura teste.

24. Prophetam dudum dixisse commemorant: Et tu, Bethlem, in terra Iuda minima Nequaquam eris, ex te dux egreditur, Iacob qui regit.

25. Herodes magis clam vocatis inquiens: Ite, videte, ubi est; recurrite, Referte mihi, ut et ego veniens Adorem eum.

26. Vulpes Herodes, cur cauda dissimulas Praedam captare, qui belvino gutture Sanguinem sitis, agni carnes esuris, Lupe crudelis?

27. Non vales tuam satiare rabiem, Non agnus ille singularis moritur; Nam, velis, nolis, ipse rex est Israel, Rerum creator.

28. Mori dignatur alio in tempore, Quando de cruce pretiosi fuderit Sanguinis undam, quae mundi mortifera Crimina tollat.

29. Quid fremis, pestis? iste rex omnipotens Non quaerit tuum regnum; tibi poterat Donare suum, si non esses perfidus, Valde superbus.

30. Quos iugulasti teneros agniculos Sanguinolento, maledicte, gladio, Ablactat vivos in ovili proprio Pastor benignus.

31. Euntes magi, stella nova praevia

Hos praecedebat, donec venit, steterat, Ubi tunc puer erat in cunabulis, Redemptor orbis.

32. 0 quam pervalde magno magi gaudio Videntes stellam sunt gavisi! protinus Intrantes domum invenerunt puerum, Virginis prolem.

33. Qui procedentes flexis eum genibus Adoraverunt apertis de thesauris Aurum, tus, murram obtulerunt Domino, Regi Deoque.

34. In somnis Persae, ne redirent, caelitus Sunt admoniti, ad Herodem perfidum; Suam reversi sunt viam per aliam In regionem.

35. Illusum demens se videns rex impius A magis, Bethlem misit, cunctos pueros Mox a bimatu et infra per gladium Mandat extingui.

36. 0 quam crudelis saevaque sententia ! Mactare iubes teneram infantiam, Insciam mali; cur non parcis, impie, Lacteae proli?

37. Vox in excelsis, heu, quam tristis resonat, Ploratus multus, ululatus maximus ! Maternus luctus frustra premit ubera Nullo sugente.

38. Salvete, flores martyrum candiduli, Respersi tamen rore, sed purpureo, Felices nati hac in luce rosuli, Pulchri, tenelli !

39. Caelestes prorsus, manibus angelicis Collecti, estis in canistro positi, Agni sub throno quam bene reconditi In sempiternum.

40. Herodes iacet in profundo tartari

Combustus flammis, laceratus vermibus, Pice decoctus, dissipatus fulgure, Infelix ille.

41. In paradiso vos, famosi pueri,

Aureas domus fontesque lactifluos, Mellitos modo possidetis rivulos, Semper felices.

42. Gloria sanctae trinitati unicae, Patri natoque, flamini paraclito, Et nunc et ultra per immensa saecula Sit semper. Amen.