105. (7. ) In Dedicatione Ecclesiae.

1. Refulgent clara huius templi culmina, Perfusa luce septiformis spiritus Christi rubescunt purpurata sanguine, Perlita rore pretiosi balsami Odore fragrant mixtis aromatibus.

2. Sint semper istam supra domum, Domine, Tui aperti, deprecamur, oculi, Auresque tuae sint intentae iugiter Diem per omnem noctis et in tempore, Tuoque semper ore benedicito.

3. Sit angelorum hic alta frequentia, Descendat omnis huc caelestis gratia, Diffusa sancto largiente spiritu, Vultu sereno sancta semper trinitas Pio favore dignetur inspicere.

4. Nubes sacrata, quae pendens incubuit Deo iubente supra tabernaculi Tectum, beatus quod Moyses in eremo Fixit, precamur, huius aulae moenia Adflata sancto perfundat spiramine.

5. Famosa, dudum quae replevit atria Templi dicati, nebula perlucida Orante puro Salomone pectore, Hanc missa, Christe, caeli de cacumine Domum fecundet sempiterno munere.

6. Quicunque tuum sanctum nomen supplici Plenoque corde precatusque fuerit Huius in aedis sancto domicilio, Te largiente sit liber a crimine; Exclude pestem, morbos omnes dilue.

7. Tuo sacrato hic depasti corpore Tuoque sancto satiati sanguine, Ab hoste tuo defensi munimine Laeti fideles sortiantur servuli Vitae perennis sine fine gaudia.

8. Rerum creator, Iesu, patris unice, Mundum cruore salvas qui purpureo, Peccata tollis solus qui pestifera, Dignare tuos munere gratuito Ad astra caeli mittere ruricolas.

9. Sit semper alta Deo patri gloria, Omnis potestas sit dilecto filio Sanctoque semper gloria paraclito, Honor et virtus, laus, decus, imperium Et nunc et ultra sit per cuncta saecula.