100. (2. ) In Purificatione sanctae Mariae.

1. Refulsit almae dies lucis candidus Partum puellae virginis per aureum, Quando supernis filius de sedibus A patre missus homo nasci voluit, Permansit idem proles alti numinis.

2. Legis sacratae sanctis cerimoniis Subiectus omnis calamo Mosaico Dignatur esse, qui regit perfulgidos In arce patris ordines angelicos Caelumque terram fundavit ac maria.

3. Postquam puellae dies quadragesimus Est adimpletus, iuxta legem Domini Maria virgo Iesum sanctum puerum Ulnis sacratis templi tunc in atriis Tulit tremendi genitoris unicum.

4. Mater beata carnis sub velamine Deum ferebat umeris castissimis, Dulcia strictis basia sub labiis Deique veri hominisque impresserat Ori, iubente quo sunt cuncta condita.

5. Duos parentes tulerunt candidulos Pullos columbae lacteolis plumulis, Dedere in templo par pro eo turturum, Legis veluti promulgabat sanctio, Quales perustas consecrarent hostias.

6. Dei sacerdos humilis, mitissimus Erat in urbe, iustus, senex optimus, Felix beatus Simeon caelifluo Sanctoque plenus adfuit spiramine Sacra sub aula nutu Dei concitus.

7. Hic namque dudum responsum acceperat Sancto docente spiritu, quod vinculo Mortis resolvi non possit de corpore, Donec videret Christum vivens Domini, Quem misit altis genitor de soliis.

8. Suscepit ergo puerum in manibus Agens superno genitori gratias, Ulnis retentans benedixit Dominum, Amore plenus cordis cum dulcedine, Addens et alto sermone subintulit:

9. Dimitte tuum, Domine, nunc obsecro, In pace servum, quia meis merui Tuum videre salutare visibus, Quod praeparasti pietate unica Ante tuorum populorum faciem,

10. Fulgensque lumen gentium in oculis, Gloriam plebis Israelis germini; Positus hic est in ruinam scandali Et in salutem Iacob stirpis aureae, Donec secreta revelentur cordium.

11. Ipsius, inquit, tua, sancta genetrix, Transibit ictus gladii per animam. Servabat alto mystica sub pectore Maria verba conferens alacriter, Dictis supernis credula fideliter.

12. Doxa sit patri per immensa saecula Et Iesu Christo, patris unigenito, Decus, potestas, virtus super aethera Sancto per omne saeculum paraclito, Laus infinita, honor et imperium.

11, 3 Servabat casto AB.

12, 1 sq. in CD:

Gloria tibi, Iesu, magni nominis Et tibi, nate patris unigenite,