Congregatio de Causis Sanctorum 201

torturam in exsilium vel carcerem commutarent. Rogatione autem denegata,

acerrimum supplicium chordae biduo, diebus scilicet 2 et 3 mensis Septem-

bris, passus est. Nocte intermissa tormentoque iudicum mandatu suspenso,

ministri evangelici, qui tribunali aderant, saevitias ipsi a se resumpserunt et,

cum Servus Dei confessarium petiit, hunc ludibriose reiecerunt. Tunc vero,

Christi et Ecclesiae amore omnino captus, ad mortem, quam iam proximam

sentiebat, se paravit, fidem suam confitens, misericordiae Dei prorsus

confisus. Ad vesperam diei 4 mensis Septembris, dum excruciabatur, Thusi

morte occubuit.

Martyris fama circumfusa, aestate anni 1619, christifideles caverunt, ut

exuviae eius mortales clandestine refoderentur et in abbatiam Fabariensem

reponerentur, ubi usque ad annum 1845 manserunt, cum, Episcopi Comensis

cura, translata sunt in ecclesiam Sanctuarii Saxellae ac dein, anno 1852, in

ecclesiam Collegiatam Sondrii.

Apud Curiam Episcopalem Comensem, a die 8 mensis Februarii anno 1935

ad diem 20 mensis Iunii anno 1936, Causa beatificationis inita est per cele-

brationem Processus Ordinarii et, a die 7 mensis Iulii anno 1995 ad diem 26

mensis Aprilis anno 1996, novis recollectis documentis, per celebrationem

Inquisitionis dioecesanae super martyrio Servi Dei, quorum auctoritas et

vis iuridica a Congregatione de Causis Sanctorum Decreto diei 23 mensis Maii

anno 1997 probatae sunt. Positione confecta, iuxta suetum morem, die 6

mensis Maii anno 2003, Congressus Peculiaris Consultorum Historicorum

factus est et, die 27 mensis Martii anno 2009, Congressus Peculiaris Consul-

torum Theologorum, favente cum exitu. Patres Cardinales et Episcopi in

Sessione Ordinaria die 11 mensis Octobris anno 2011 habita, audita relatione

Excellentissimi ac Reverendissimi Domini Salvatoris Fisichella, Archiepisco-

pi titularis Vicohabentini, Causae Ponentis, agnoverunt Servum Dei Nico-

laum Rusca ob fidelitatem erga Christum et Ecclesiam confessam verum

martyrium passum esse.

De hisce omnibus rebus, referente infrascripto Cardinali Praefecto, certior

factus, Summus Pontifex Benedictus XVI, vota Congregationis de Causis

Sanctorum excipiens rataque habens, hodierno die declaravit: Constare de

martyrio eiusque causa Servi Dei Nicolai Rusca, Sacerdotis dioecesani, in casu

et ad effectum de quo agitur.