Acta Apostolicae Sedis - Commentarium Officiale214

AVENIONENSIS

Beatificationis et Canonizationis Servi Dei Mariae-Eugenii a Iesu Infante (in saec.:

Henrici Grialou), Sacerdotis professi ex Ordine Carmelitarum Discalceatorum,

Fundatoris Instituti Saecularis Dominae Nostrae a Vita (1894-1967)

DECRETUM SUPER VIRTUTIBUS

« Quis putas est fidelis servus et prudens, quem constituit dominus supra

familiam suam, ut det illis cibum in tempore? Beatus ille servus, quem cum

venerit dominus eius, invenerit sic facientem » (Mt 24, 45-46).

Revera Servus Dei Maria-Eugenius a Iesu Infante hoc in fideli ac prudenti

homine revibrat, quem Dominus custodem supra discipulos suos constituit:

vita eius, enim, assiduum fuit, impellente Spiritu Sancto, perfectionis in fide,

humilitate et caritate studium.

Ipse Servus Dei (in saec.: Henricus Grialou) Guaci in Gallia die 2 mensis

Decembris anno 1894 e familia modestae condicionis natus est. Vocatione ad

sacerdotium iam inde a pueritia percepta, Segusii in Italia apud Scholam

Apostolicam Patrum Spiritus Sancti acceptus est; dein vero expostulare

praeoptavit, ut in Seminarium dioecesanum Graviae admitteretur, in quo

spiritualitate Sanctae Teresiae a Iesu Infante familiarius usus est. Theologiae

ac philosophiae cursus apud Seminarium Maius Ruthenense frequentavit.

In exercitu ex iure conscriptus est: quos tamquam miles etiam primo

totius mundi bello saeviente degit, asperrimi fuerunt anni, sed facultatem

ei concesserunt « humani certaminis » mente amplectendi. Expleto bello, Ser-

vus Dei studia renovare valuit et, dum quondam secesserat in subdiaconatus

praeparationem, praesertim post lectam sancti Ioannis a Cruce vitam, palam

vocationem ad Carmelum animadvertit. Sic, paulo post ordinationem sacer-

dotalem, quae die 4 mensis Februarii anno 1922 evenit, Novitiatum Carme-

litarum Antonae ingressus est. Hic vita orationis et contemplationis omnino

permaduit ac spiritualitatem sanctae Teresiae a Iesu et rationem sanctae

Teresiae a Iesu Infante funditus pertractavit, e qua quidem afflatum nominis

sui religiosi hausit.

Post professionem simplicem, Servus Dei Insulam missus est, ut institu-

tionem monasticam in Conventu loci perficeret et, die 11 mensis Martii anno

1926, professionem religiosam perpetuam emisit. Anno 1928, Superior domus