Acta Apostolicae Sedis - Commentarium Officiale216

In fertilitate enixae et actuosae vitae, spiritualitas Servi Dei emicuit

firmitate fidei cotidiana mentis oratione enutritae, eucharisticae celebrationis

fervore, constanti suipsius Spiritui Sancto oblatione, immensa Mariae

Virginis fiducia, devotione erga Sanctos Ordinis Carmelitarum et Sanctam

Emerentianam, necnon missionali sollicitudine, quae eum provexit, ut totam

vitam Domino offerret. Instituti saecularis fundatione moderatam inter

rationem contemplationis et apostolatus Ordinis Carmelitarum proposuit

summam. Magister fuit spiritualitatis et sacerdotes, Seminarii alumnos,

religiosas multosque quoque christifideles ipse prosecutus est. Hereditate

reliquit amplum copiosumque homiliarum, conferentiarum et lectionum pa-

trimonium, necnon textum, cui titulus «Deum videre cupio », quibus proposi-

tum suum, sicut dicebat, « contemplationis in viis » et universalis vocationis

ad sanctitatem fovendae expresse illustravit. Fortitudine tulit intimas

poenas et labores apostolicos, qui ipsum per totum iter pro bono Ecclesiae

consumptum comitati sunt.

In Capitulo anno 1963 celebrato denuo electus est Superior Provinciae et

anno 1966 renovatus. Aetas autem et infirma valetudo Servi Dei iam infre-

gerant vires, qui, tumore correptus, die 27 mensis Martii anno 1967 in loco

Dominae Nostrae a Vita mortem occubuit, ultimis his effatis verbis: « Ad

amplexum Spiritus Sancti adeo... In manus tuas, Domine ».

Ob eius sanctitatis famam Causa Beatificationis et Canonizationis

apud Curiam Archiepiscopalem Avenionensem inita est per celebrationem

Inquisitionis dioecesanae a die 7 mensis Aprilis anno 1985 ad diem 5 mensis

Martii anno 1994 et Inquisitionis Rogatorialis apud Curiam Archiepiscopa-

lem Tokiensem a die 3 ad diem 5 mensis Aprilis anno 1990, quarum auctoritas

et vis iuridica a Congregatione de Causis Sanctorum die 25 mensis Novembris

anno 1994 probatae sunt, sicut et, die 24 mensis Martii anno 1999, Supple-

mentum Inquisitionis apud Curiam Archiepiscopalem Avenionensem a die 20

mensis Februarii anno 1997 ad diem 10 mensis Martii anno 1998 institutum.

Positione confecta, die 14 mensis Iulii anno 2010, in Congressu Peculiari

Consultorum Theologorum prospero cum exitu disceptatum est, iuxta

consuetudinem, an Servus Dei more heroum virtutes christianas exercuisset.

Patres Cardinales et Episcopi in Sessione Ordinaria diei 11 mensis Octobris

anno 2011, audita relatione Excellentissimi ac Reverendissimi Domini

Laurentii Chiarinelli, Episcopi emeriti Viterbiensis, Causae Ponentis, professi

sunt Servum Dei virtutes theologales, cardinales iisque adnexas in modum

heroum exercuisse.