774 Acta Apostolicæ Sedis - Commentarium Officiale

Summo Pontifice receptus est Beato Pio IX, cui dono Lexicon et Gramati-

cam ojibwanae linguae dedit. Deinde, ad dignitatem Episcopi residentialis

Michiganiae Superioris evectus est et, anno 1857, primae cathedrae suae

episcopalis adiit in possessionem, scilicet Sanctae Mariae Ormensis, quae

postea in Dioecesim erectura esset. Die 23 mensis Octobris anno 1865,

Servus Dei sedem episcopalem Marquetam transtulit, quam magis censuit

civitatem pastoralis navitatis moderationi indoneam cuiusque primus factus

est Episcopus.

Die 9 mensis Octobris anno 1866, in Secunda Synodo Nationali Balti-

morensi pergravi ictu ad cerebrum percussus est, e quo nullomodo post-

modum convalescere valuit. Post annum circiter infirmitatis, quam animi

tranquillitate et infrenatis viribus tulit, die 19 mensis Ianuarii anno 1868

Marquetae Servus Dei pie in Domino quievit.

Ob eius sanctitatis famam, Causa Beatificationis et Canonizationis apud

Curiam Episcopalem Marquettensem in Civitatibus Foederatis Americae

Septentrionalis inita est per celebrationem Processus canonici a die 28

mensis Augusti ad diem 27 mensis Septembris anno 1988, cuius auctoritas

et vis iuridica a Congregatione de Causis Sanctorum die 21 mensis Octobris

anno 2002 probatae sunt. Positione confecta, die 1 mensis Decembris anno

1998, in Congressu Peculiari Consultorum Historicum spectata est. Die 12

mensis Martii anno 2011, in Congressu Peculiari Consultorum Theologorum

prospero cum exitu disceptatum est, iuxta consuetudinem, an Servus Dei

more heroum virtutes christianas exercuisset. Patres Cardinales et Episcopi

in Sessione Ordinaria, quam ego, Card. Angelus Amato, die 7 mensis Fe-

bruarii anno 2012 praesedi, audita relatione Excellentissimi ac Reverendis-

simi Domini Ioannis Pauli Benotto, Archiepiscopi Pisani, Causae Ponentis,

professi sunt Servum Dei virtutes theologales, cardinales iisque adnexas in

modum heroum exercuisse.

Facta demum de hisce omnibus rebus Summo Pontifici Benedicto XVI

per infrascriptum Cardinalem Praefectum accurata relatione, Sanctitas Sua

vota Congregationis de Causis Sanctorum excipiens rataque habens, hodier-

no die declaravit: Constare de virtutibus theologalibus Fide, Spe et Caritate

tum in Deum tum in proximum, necnon de cardinalibus Prudentia, Iustitia,

Temperantia et Fortitudine iisque adnexis in gradu heroico Servi Dei Friderici

Irenaei Baraga, Episcopi Marquettensis, in casu et ad effectum de quo agitur.