772 Acta Apostolicæ Sedis - Commentarium Officiale

MARQUETTENSIS

Beatificationis et Canonizationis Servi Dei Friderici Irenaei Baraga, Episcopi

Marquettensis (1797-1868)

DECRETUM SUPER VIRTUTIBUS

« Euntes, ergo, docete omnes gentes, baptizantes eos in nomine Patris et

Filii et Spiritus Sancti, docentes eos servare omnia, quaecumque mandavi

vobis. Et ecce, ego vobiscum sum omnibus diebus usque ad consummationem

saeculi » ( Mt 28, 19-20).

Hoc Domini resurrecti mandatum admodum a Servo Dei Friderico Ire-

naeo Baraga, episcopo, perfectum est, qui apostolatui in vita sua Evangelii

nuntiandi summopere deserviit et constanti ministerii virtute omnem om-

nibus se facere valuit.

Servus Dei die 28 mensis Iunii anno 1797 in vico Villa Malavas, nunc in

finibus Sloveniae, e locupleti familia natus est. Rudimentis primae institu-

tionis privatim receptis, Labaci et Vindobonae studia prosecutus ac titulum

magistri in iure adeptus est. Consectationum harum tempore, ad sacerdotium

vividam iam percepit vocationem, cui autem, auctoritate Sancti Clementis

Mariae Hofbauer, presbyteri e Congregatione Sanctissimi Sacramenti, quem

consuluerat, interim usque ad expletos cursus supersedit. Seminarium dioe-

cesanum Labacense denique ingressus, die 21 mensis Septembris anno 1823

presbyteratu auctus est. Die 14 mensis Octobris anno 1824 primum suum

cooperatoris paroecialis in vico Šmartin accepit munus, summa pastoris

praesertim in reconciliationibus ministrandis et in catechesi tradenda emi-

nens sollicitudine. Anno 1828 Methullum translatus est, ubi etiam scholae

elementaris officio functus est magistri.

Fridericus Irenaeus tamen ad navitatem missionariam sese appellari

persensit, de quibus omnibus votis cum Episcopo locutus est, quem vero

petitiones quaedam interdum e Dioecesi Cincinnatensi in regione Pulchri

Fluminis seu Ohio e Civitatibus Foederatis Americae Septentrionalis attige-

rant. Anno 1831 idcirco Servus Dei patriam reliquit, Cincinnatum pervenit

ac dein, indigenarum nativorum sermonum studio impensius inito, apud

tribum Ottavensium in loco Arbore Adunco seu vulgo Arbre Croche resedit.

Mense Iunii anno 1833, magno cum corporis vitaeque discrimine, inter