798 Acta Apostolicæ Sedis - Commentarium Officiale

CRACOVIENSIS

Beatificationis et Canonizationis Ven. Servae Dei Sophiae Czeska-Maciejowska,

Fundatricis Congregationis Virginum a Praesentatione Beatae Mariae Virginis

(1584-1650)

DECRETUM SUPER MIRACULO

Venerabilis Serva Dei Sophia Czeska-Maciejowska anno 1584 in loco

vulgo Budziszowice (in Polonia) est orta, e familia quadam antiquae nobilis

stirpis et solidae fidei Christianae. Postquam suae condicioni conformem

educationem accepit, anno 1600, vix sedecim annos nata, nobili viro Ioanni

Czeski nupsit, a quo, anno 1607, vidua est facta. Licet iuvenis esset, ditis

et cum multis petitoribus, noluit matrimonium iterum contrahere ut vitam

suam in operibus misericordiae impenderet, potissimum in bonum puel-

larum parentibus orbatarum et pauperum. Annis 1621-1627, proprietates

domumque suam ita composuit ut vitam daret Instituto appellato Domus

Virginum Praesentationis Beatissimae Mariae Virginis vel etiam Domus pro

orphanellis, accipiendis et instituendis iuvenibus egentibus destinato. Prima

omnino fuit huiusmodi schola feminea in Polonia. Venerabilis Serva Dei

mysterium elegit Praesentationis Beatae Mariae Virginis veluti exemplum,

quia voluit ut ipsa, eius consorores et puellae educandae in sui ipsius dedi-

tione viverent, exemplum sequentes Mariae Sanctissimae. Mense Maio anno

1627, Episcopus Cracoviensis Statuta approbavit novae fundationis atque

Institutum canonice est erectum. Venerabilis Serva Dei eius fuit modera-

trix, magistra et animatrix usque ad mortem, quae Cracoviae die 1 mensis

Aprilis anno 1650 evenit. Summus Pontifex Benedictus XVI die 27 mensis

Iunii anno 2011 edixit Servam Dei virtutes theologales, cardinales iisque

adnexas heroicum in modum exercuisse.

Beatificationi eius prospiciens, Postulatio Causae, examini huius Con-

gregationis de Causis Sanctorum coniectam miram subiecit cuiusdam pueri

sanationem quae Cracoviae anno 2000 est patrata. Hic enim, novem annos

natus, coepit acutos sentire in fronte dolores, quibus accesserunt alta cor-

poris febris atque confusionis status. Puer in valetudinarium est exceptus,

in quo etiam dolores abdominis pati coepit. Eius condiciones in deterius

labebantur, etenim artuum tremores, memoriae turbationes, augmentum