72. In Ascensione DN.

1. Rex omnipotens
die hodierna.

2 a. Mundo

triumphali redempto
potentia

2 b. Victor

ascendit coelos, unde
descenderat.

3 a. Nam quadraginta
postquam surrexerat

3 b. Diebus sacris

confirmans pectora

4 a. Apostolorum,
pacis cara
relinquens oscula.

4 b. Quibus et dedit
potestatem
laxandi crimina

5 a. Et misit

eos in mundum,
baptizare cunctas animas

5 b. In patris
et filii et
sancti spiritus clementia.

6 a. Et convescens
praecepit eis,
ab Jerosolyma

6 b. Ne abirent

sed exspectarent
promissa munera.

7 a. Non post multos
enim dies
mittam vobis
spiritum
paraclitum in terra

7b. Et eritis
mihi testes
in Jerusalem,
Judaea
sive et Samaria.

8 a. Et cum hoc dixisset,
videntibus illis
elevatus est,
et nubes clara

8b. Suscepit eum ab
eorum oculis;
intuentibus
illis aera

9 a. Ecce stetere
amicti duo viri
in veste alba

9b. Juxta dicentes:
quid admiramini
coelorum alta?

10 a. Jesus enim

hic, qui assumptus
est a vobis ad
patris dexteram,

10 b. Ut ascendit,
ita veniet
quaerens talenti
commissi lucra.

11a. O Deus maris,
poli, arvae,

hominem, quem creasti,
fraude subdola

11b. Hostis expulit
paradiso

et captivatum secum
traxit tartara.

12 a. Sanguine proprio
quem redemisti Deo
illuc et provehis,
unde prius corruit,
paradisi gaudia.

12 b. Da nobis, quaesumus,
sempiterna gaudia,
judex cum veneris
judicare saecula,
in sanctorum patria:

13. In qua tibi cantemus
omnes Alleluja.