CAPUT X.

De electionibus et earum praecipuis auctoribus.

Rursus pars electionum docet eligere horam laudabilem incipiendi aliquod opus ei cujus nativitas nota fuerit per convenientiam domini rei cum significatore nativitatis ejusdem. Quod si fuerit ignota nativitas, accipe ejus interrogationem certissimam, eo quod homo quando interrogat, jam pervenit ex nativitate sua ad bonum seu ad malum quod significavit ejus nativitas : et loco nativitatis interrogationem ipsam accipere pro radice, eo quod cum nativitates sint res naturales, interrogationes sunt similes naturalibus.

Quarum siquidem responsio agitur in libro electionis Zachei, qui sic incipit : Omnes concordati sunt, etc. Et in libro electionum Haly, qui sic incipit : Rogasti me, charissime, etc. Caeteri sunt quidam libri, qui de universis partibus sparsim tractant, ut est liber centum verborum Ptolemaei, qui sic incipit : Mundanorum, etc. Et liber quinquaginta praeceptorum Zachei, qui sic incipit : Scito, quod significata lunae, etc. Et li- ber centum verborum Almansoris, qui sic incipit : Signorum dispositio est, ut dicam, etc.