20. In Epiphania DM.

1. Hanc diem tribus
Dominus signis
illustrat :

2 a. Puer nobis veniens
de supernis
et induens mortalia

2 b. In praesepe ponitur,
adorandus
monstratur stella praevia.

3 a. In Oriente

cernentes nova lumina

3 b. Persarum reges

adcurrunt dare munera

4 a. Nato, qui cum patre
regit cuncta saecla

4 b. Et gubernat, montes
etiam ponderat.

5 a. Aurum, thus et myrrham
deferentes

regi, veram carnem
assumpsisse
typice praedicant.
Jordanis hodie
retro subtrahit undulas,

5 b.. Johannes expavit,
salvatorem

tingere, clamans: me
magis tu lava;
de coelo intonat
genitor, filii
placet, inquit, gloria.

6 a. Et sanctus

spiritus columbae specie

comparem

se clamitat.

Hodie nuptiales

thalamos Dominus

sanctificavit

vertens in vinum flumina,

6 b. Stupidos

vetustatis latice,

subito

efficiens

sapidos, omnibus et

propinavit sanctae

praemia vitae

porgens sanguinis pocula.

7 a. Quaesumus,

jam nos respice tu,
pater, et viam patriae
supernae demonstra,

7 b. Ut recto

semper gradientes
curru mereamur regiis
scandere praecelsa.

8 a. Tu, patris filius,
humilis populi
audi vocis cantica,

8 b. Et sancto petimus
flamineo spiritu
voces nostrae concinant,

9. Ut tibi jugiter
concinentes
veniant ad gaudia.