214. De ss. Cyrico et Julitta.

la. Lumen vitae sanctis datum,
Res praeclara, munus gratum,
Felix eminentia,

1b. Quo virtutum jubar crescit,
Jugum mortis emarcescit,
Floret innocentia.

2 a. Lucis hujus ornamento
Forma datur firmamento,
Firmatur ecclesia,

2b. Stellis splendor ampliatur,
Sanctis honor cumulatur
Et accedit gratia.

3 a. Quis humanae statum mentis
Solidavit in tormentis,
Quis subegit tristia?

3 b. Quis immanes tyrannorum
Pressit motus et malorum
Confregit imperia?

4 a. Christus vitae lumen verum
Pacis auctor, ordo rerum,
Dei sapientia,

4b. Dei virtus, rex virtutum,
Verbum verax, cujus nutum
Subsequuntur omnia.

5 a. Hic praecones veritatis
Eruditos in mandatis
Formavit scientia,

5 b. Ut efferrent excellenti
Gradu statum testamenti
Super sacrificia.

6 a. Dedicata sunt in sanctis,
Quae per manum judicantis
Coronantur gloria.

6 b. Hinc praeclarae passiones,
Plagae mortis et agones,
Hinc sacra martyria.

7 a. Hoc virtutes insignitae
Cynci sunt et Julittae
Claraque victoria,

7 b. Qui quo Christo passi poenas
Sedes nacti sunt amoenas
Et regna felicia.

8 a. Res miranda, res stuporis,
Res coronae dignioris,
Res virtutis conscia,

8 b. Quod tormentis actus crebris
Sexus stetit muliebris
Nec cessit infantia.

9 a. Infans tener in tortura
Fide Christum loquens pura
Fideli constantia

9b. Cum parente flagellatur,
Quae plus tamen anxiatur
In prolis angustia.

10 a. Quos non posse frangi videns
Ira ferox, voce stridens
Praeses ab insania

10 b. Condemnatos sorte pari
Jubet ambos decollari
Dictante saevitia.

11a. Vita segnes, actu rei

Vos precamur, sancti Dei,
Voce voti praevia,

11b. Ut ad regnum claritatis
Nos orando transferatis
De mundi malitia.