150. De beata Maria V.

la. Virens vitae virgula,
Quae virendo sedula
Nec elisa macula
Mystico flores
flore fecunda.

1b. Flos ut sol egreditur,
Flos, quo mors elabitur,
Virgam nulla sequitur
Gratia pari
facta fecunda.

2a. Ave, Dei cellula,
Quae connexa vincula
Separas naturae,

2 b. Nam ut sidus radium
Non corrupta filium
Novo paris jure.

3 a. Ave porta,
Lux exorta

Per quam sumpsit aditus,

3 b. Ut veniret
Et subiret

Nostrae carnis habitus.

4 a. Dextra Dei vas politum,
Vas purgatum, vas ambitum
Castitatis circulo.

4b. Ut prophetae praedixere,
Vas electum continere
Deum matris gremio.

5 a. Ave, virgo virginum
Non evirginata,
Plebis spes solaminum,
Castitas signata,
O felix puerpera,

5b. Prole cujus uteri
Vita restaurata,
Plebs erepta funeri,
Diu demorata

Vitae sumit foedera.

6 a. O res mira sed relata,
Quod creantem res creata,
Sua rerum patrem nata
Parit, praebet ubera.

6 b. Virgo, vitae spes secunda,
A reatu nos emunda,
Pietatis purgans unda
Perduc ad coelestia.