35. In Festo Pentecostes.

la. Lux insignis.
Ardens ignis,

Jesu Christi spiritus,

1b. Peccatorum
Qui cunctorum
Exsistis paraclitus.

2 a. Summa exstas essentia,
Nam, ut credit ecclesia,
Deus es et spiritus:

2 b. Deus propter unitatem,
Flamen propter trinitatem
Coaequalem poenitus.

3 a. Tu creator non creatus
Es nec pater neque natus.
Sed procedens spiritus:

3b. Ab utroque tu procedis
Et a nullo tu recedis
Nec es ulli subditus.

4 a. Par utrique potestate
Et ubique majestate
Es complendo omnia:

4b. Tu persona trinitatis,
Quae das dona unitatis
Cum omnipotentia.

5 a. Tu amor es et pietas
Et est tua proprietas,
Virtutum dare genera;

5 b. In te subsistunt omnia,
Per te solvuntur noxia
Pacisque constant foedera.

6 a. Tu divina
Disciplina,
Columbina
Tu doctrina
Ignisque es et unctio:

6 b. Quos vis, pungis,
Quos vis, ungis
Et compungis,
Quos perungis,

Sic per te fit salvatio.

7 a. Nunc, spiritus
Alme, veni
Et funditus
Cuncta leni
Nobis adversantia ;

7 b. Et qui donis
Es septenus,
Fac ut bonis
Tuis plenus

Sit grex tuus, Alleluia.