36. In Festo Pentecostes.

1 a. Hodierna die clara
Incolatus nostri ara
Immoletur hostia,

1b. Quinquagena lux venerat,
Qua Aegyptum exierat
Fugiens saevitia

2 a. Pharaonis grex fidelis,
Opem adepta e caelis,
Cum transiret maria.

2b. Montis Sina ad radices
Suas demittunt cervices
Trahentes suspiria,

3 a. Sonant voce tonitrua,
Crebra mittuntur fulgura,
Turba pavet nescia,

3 b. Quid protendat miraculum,
Quod agit ante populum
Spiritus praesentia.

4 a. Lex caritatis traditur
Et Moyses imbuitur
Divina scientia;

4 b. Sic hodie apostolis,
Multis datur Christicolis
De supernis gratia.

5 a. Linguas ignis adspiciunt,
Dona mira percipiunt,
Corda sunt ardentia.

5 b. Amor patris et filii,
Teri dator consilii.
Septiformis gratia,

6 a. Praesentibus infunditur,
Fortitudo tribuitur,
Caritas, clementia ;

6 b. Suavitas et bonitas,
Intellectus, jucunditas,
Dona sunt insignia.

7 a. Resurrexit et ascendit,
Pro injustis qui descendit,
Suis donans talia;

7 b. Dono tali profecerunt,
Qui capere meruerunt
Spiritus solatia.

8 a. Hujus diei carmina

Nulla comprendit pagina
Laudis excellentia ;

8 b. Verax sine fallacia,
Felix sine miseria

Bona praestans dulcia.

9 a. Servos Jesu nos custodi,
Doce, rege et exaudi
De precum instantia;

9b. Qui culparum es venia,
Vera nobis da gaudia
In aevum manentia ;

10 a. Ut quae tua processio
Sit de patre et filio,
Norit amicitia.

10 b. Hoc tua praestet gratia,
Quae cunctis erit omnia
In aeterna gloria.