Acta Apostolicae Sedis - Commentarium Officiale186

HERBIPOLEN.

Beatificationis et Canonizationis Servi Dei Engelmari Unzeitig sacerdotis professi

Congregationis Missionariorum de Mariannhill (1911-1945)

DECRETUM SUPER VIRTUTIBUS

« Quis nos separabit a caritate Christi? Tribulatio an angustia an persecu-

tio an fames an nuditas an periculum an gladius? Sicut scriptum est:

"Propter te mortificamur tota die, aestimati sumus ut oves occisionis". Sed

in his omnibus supervincimus per eum, qui dilexit nos » (Rom 8, 35-37).

Pauli Apostoli fervida professio revocatur in humanis, christianis sacer-

dotalibusque eventibus Servi Dei Engelmari Unzeitig, qui brevi in vitae

cursu vividum testimonium summae adhaesionis Domino et generosi minis-

terii erga fratres praebuit.

Servus Dei natus est Kalendis Martiis anno 1911 in vico Greifendorf, in

regione Schoenhengst, Orientali in Moravia, illa in aetate sub dicione Imperii

Austriae et Hungariae et in ecclesia paroeciali illius loci baptizatus est et

accepit nomen Hubertum.

Eius familia vehementer catholica et locus originis pristino christiano

more eminuerunt, una cum solida institutione religiosa et consuetudine animi

attentionis erga alios, mutuae necessitudinis hominum et participationis.

Orbatus patre sextum annum aetatis agens et expleto cursu institutorio

minore, adhuc parvulus Hubertus necessitate laborandi pro matre et sorori-

bus impulsus est.

In adulescentia clare et fortiter vocationem ad religiosam vitam animad-

vertit et, comprobata a familiaribus electione, in pueritia receptus est iuxta

Seminarium Patrum Missionariorum de Mariannhill ubi studia gymnasii in-

cepit et maturitatis experimento optime probatus est et, expleto novitiatu,

sacra vota emisit nomen Engelmari suscipiens. Dum haec gerebantur, de

diligentia, prudentia et sedulitate tam a superioribus quam a sodalibus valde

aestimabatur. Anno 1939 Servus Dei Herbipoli sacris ordinibus initiatus est

et, post primas pastorales experientias, nominatus est parochus auxiliaris

in vico Glöckelberg in Bohemia, cuius in dicione erat regio Germanorum

Sudetorum, qui benevole adiunctionem ad dominationem Hitlerianam

acceperant.