Congregatio de Causis Sanctorum 189

HIEROSOLYMITANA LATINORUM

Beatificationis et Canonizationis Ven. Servae Dei Mariae Alfonsinae Danil Ghattas

e Tertio Ordine Sancti Dominici fundatricis Congregationis sororum a Sanctissimo

Rosario de Hierusalem (1843-1927)

DECRETUM SUPER MIRACULO

Venerabilis Serva Dei Maria Alfonsina Danil Ghattas in civitate Hieroso-

lymae die 4 mensis Octobris anno 1843 nata est. Puella scholam a Sororibus

Sancti Ioseph ab Apparitione directam frequentavit, apud quas vocationem

ad vitam consecratam perfecit et habitum religiosum induit, nomen sumens

Sororis Mariae Alfonsinae et sollemnem emittens professionem. Mox munus

catechesis tradendae in schola populari primum Hierosolymae, dein Bethle-

hem suscepit. Cum autem sese Beatae Mariae Virginis afflatu inspiratam

animadverteret, initium dedit novae familiae religiosae et, auctoritatibus

competentibus rite approbantibus, Congregationi Sororum a Sanctissimo

Rosario. Hoc in novo Instituto, cuius cofundatrix habita est, ministerium

magistrae Iaffae exercuit et dein plures domus variis in partibus Medii Orien-

tis instituit. Malarica febri correpta, Hierosolymam rediit, ut curaretur. Vixit

dein in vico Zababdeo, Bethlehem, uti Superiorissa, iterum Hierosolymae ac

postremum in vico Embellio. In muneribus exercendis, quae saepius valde

onerosa fuerunt, nullum alium habebat finem quam seipsam plene voluntati

Dei conformare, pro cuius amore ingentia quoque sacrificia obiit.

Beatitudinem a Christo ministris eius fidelibus promissam die 25 mensis

Martii anno 1927 pie adepta est.

Beatificationis respectu, Causae Postulatio iudicio huius Congregationis

de Causis Sanctorum assertum subiecit mirum Hierosolymae die 30 mensis

Maii anno 2003 patratum. Casus, de quo agitur, pertinet ad perfectam inco-

lumitatem iuvenis puellae Nataliae Elias Zananiri aliorumque puerorum, qui,

coadunati pro natalicio quodam anniversario celebrando, in puteum nigrum

cloacae palatii, terrae labis causa, praecipites ruerunt. Natalia, vero, quae in

illo tempore decimum septimum annum agebat, paulo ante alios praecipita-

verat et per tempus tolerantiae aetate eius longe superius intra liquamina

ingenti contagionis colluvionisque potestate praedita, puellula sex annorum

ei obstricte circumplexa inhaerente, permansit demersa. Cum iuvenis extrahi

valuit, curae ei suppeditatae sunt contra tetani tabem et, post praevisas