54. De omnibus festis DN.

1. Virginali thalamo

Dum processit filius,
Unde nos redimeret,
non habebat melius.

2 a. Leges occultaverat
atque vaticinia,
Tandem patefieri
volens evangelia.

2 b. Dat salutem languidis,
dat pacem et gaudia
Quorum ad interitus
patebant suspiria.

3 a. Vagit infans

artus in cunabulo,
Parvo lactis
satiatus pabulo.

3 b. Super astra

regnat in coelestibus,
Qui dat escam
bestiis et avibus.

4 a. Mundus intrat lavacrum,
Destruxit simulacrum,

4 b. Per aquam et spiritum
Signat item genitum.

5 a. Planum iter et acceptum
Tendens vadit in desertum,

5 b. Hic tentatur, ne tentemur,
Sed a malis liberemur.

6 a. Quoscunque terra parturit,
Fons, panis sitit, esurit,
Nec corporis edulium
Sed salutem fidelium.

6 b. Traditus a discipulo
Capi, ligari vinculo,
Nec flagellari renuit,
Qui mori sponte voluit.

7 a. Christi resurrectio,
Ad coelos ascensio,
Pia consolatio,

7 b. Fit nostra redemptio,
Salus et protectio,
Pax et reparatio.

8 a. Per fraudis osculum
Et fellis poculum
Redemit saeculum,

8b. Nos ergo sedulum
Canamus modulum
Sed non ad oculum.

9 a. Sequens historia
Narrat haec omnia
Per evangelia,

9 b. Nos ergo mutua
Dantes tripudia
Psallamus eia.